笑到最後：再三請財爺為樓市減辣
6月8日，本欄推介美聯（1200），當日開市價3.94蚊，推介日已經係港股大時代高位，之後一路下跌，到股災日更加最低見3.21蚊，最新收報3.44蚊，至今跌近13%。
當日睇法，到今日有一半啱，一半錯。啱嘅一半係，估中發盈喜，不過，股災時完全冇幫助；錯嘅
一半係，冇諗過中國A股會咁廢，大時代咁快完，大陸資金湧港嘅財富效應肯定冇咁一大截。
正如上次分析，政策打壓二手樓，今年一手樓熱賣，上半年已發盈喜，問題在於，下半年有冇能力支持。股災都未跌得死，仲有盈喜，暫時等埋半年業績。
自己樓市自己救
本欄講過，香港可以受惠大陸政策倒退成為中國資金避難所，用嚟儲存財富，但呢個係長遠趨勢。
股災令唔少中國人財富蒸發，即使好叻沽得切，都可能要面對中證監查詢「惡意沽貨」，繼而公安上門被迫買返曬，啲錢困死喺A股，中國政府嚟緊一定睇實人民嘅戶口，搬錢到港買樓睇怕唔易。
港樓已經進入「自己樓市自己救」的階段，嚟緊樓市係強定係弱，就要睇嚇香港人有幾強承接力。
從來投資市場，最遲上車嘅一群，成為接火棒一族，但係現今樓市政策令遲上車喺跌浪仲要捱多一刀罰稅，足以令佢哋沒頂。
本地樓市係一個奇蹟之地。最經典例子2003年沙士，當年樓市水平，等同宣佈香港已死，樓價可以話係「亡港價」。頂唔順嘅人不幸破產，部份睇唔開更自盡而亡。
但係，捱得過嘅話，過去咁多年樓市奇蹟反彈，仲升穿曬所有歷史高位，呢啲就叫做香港精神。
可惜近年香港政府美其名「需求管理」，SSD「綁三年」，客觀效果係扼殺供應。
樓市升當然皆大歡喜、相安無事；一旦樓市轉勢下跌，業主因財政問題而要賣樓，早上車當然有位走盞，甚至已甩「綁三年」之期。遲上車要蝕讓，首先要蝕價，因「綁三年」更要罰稅，政策會逼到新上車業主冇「逃生門」，隨時釀成家庭悲劇。
買樓就係投資，願賭服輸好平常，但係政府唔應該制訂政策令輸錢嘅人輸得更多。高明舊年曾經寫過「請曾俊華準備樓市減辣」及「再請財爺阻689推冧樓市奸計」，今日再請曾司長多次，因為A股股災，加埋自由行零售放緩，危機四伏，而家可能係減辣的最好時機，畀返個逃生門大家。
若果等跌市先減辣，一定當壞消息咁炒，逃生門都會消失。
高明
本欄逢周一刊出
即上偶像派財演專頁：
https://www.facebook.com/bigricetea
高明
笑到最後 - 高明 舊文
