魚樂無窮：無限驚喜績優股
■港股升兩日跌一日，仲要全部大手交易。 李潤芳攝
港股升兩日跌一日，仲要全部大手交易，兩日累升逾1,500點後，噚日跌番近600點，估啱方向可以贏得好漂亮，但捉錯路同樣可以輸得好慘烈。都係嗰句，博反彈要眼明手快，唔貼市嘅，繼續休養生息吧。值得一提的是，雖然大
跌市，但細價股離奇生猛，十大威水榜股份，升幅介乎18%至48%，有六隻市值不足10億，殼股翻炒味濃，市場氣氛改善，乃不爭嘅事實。
噚日推介英皇證券（717）及恒輝（185），前者跌4.7%，後者升6.2%，勉強叫賺粒糖。因篇幅關係，未有詳細解釋推介核心原因，而家補番。兩者有個共通點，就係股權曾出現變化，變相計到幕後人士成本價（配股價/全購價）。炒股為賺錢，適用於任何人士，市況唔就，高位接貨賬面固然輸錢，隨時會影響其他財務部署；難得市況轉好，梗係拿拿臨將個價舞番上去；你比大戶入場價平一截，自然贏在起跑線。
績優股創達科技（1322）同樣有數得計，上月宣佈向浙江華航投資配售9,378萬股，佔擴大後已發行股本13.04%，配售價3.63元，較噚日收市價3.54元低3%。創達主打精密工程業務，食正工業4.0條水，現價市盈率只得7倍，信反彈未完，創達有權畀你無限驚喜！
唐牛
https://www.facebook.com/tongcow88
唐牛
魚樂無窮 - 唐牛 舊文
