中環在線：掌管新昌8年「鍾意試新嘢」
王英偉傳轉泊新碼頭
■王英偉（右）喺商界唔算好高調，但兒子王梓軒做咗歌手後就更多人識。 資料圖片
聞說新昌營造（404）主席王英偉有意離開呢間工作8年嘅公司，對於呢個傳聞，王英偉不予置評，不過佢就強調「自己鍾意試新嘢，又慣咗好多人俾我使」言下之
意，似係已經搵到更好嘅碼頭喇。
王英偉喺商界唔算十分高調，但佢原來幫過幾位城中富豪打工，包括嘉華國際（173）呂志和、恒基中國李兆基、瑞安建業（983）與瑞安房地產（272）羅康瑞，2007年底就過檔新昌。
否認與翠湖圍標有關
問佢邊位老闆最易相處，佢畀出例牌答案，話每位老闆都合作愉快。真係要講跟呢類大老闆打工嘅心得，佢就話「每件事都要先諗一諗，如果自己係老闆嘅話會點做，好定唔好都要幫老闆諗埋」。
佢2007年底做新昌話事人兼且持有股份，8年間公司生意大增，佢話，「最還得神落」係最近政府因應鉛水事件抽驗公屋食水，新昌有份承建嘅6個屋邨都合乎標準，證明公司揀選嘅分判商與內地監控都達標。
話雖如此，新昌旗下新昌管理（2340）涉嫌捲入翠湖花園圍標案，王英偉目前離開會否惹人猜測呢？王英偉回應話，遭廉署拘捕嘅董事總經理樊卓雄已辭職，至今冇同事被起訴，佢會相信同事。
不過話時話，王英偉說話聲如洪鐘，目光炯炯有神，唔講都未必睇得出佢今年62歲，佢話自己冇做運動，最大運動量就係出差趕飛機時，喺機場急步行來行去。
睇嚟佢應該係好鍾意返工，一放假就會病嗰類人！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
