中環在線：馬雲為光棍節搞新意思
雙11春晚 馮小剛執導
■馬雲計劃喺光棍節前一晚舉行大型晚會，全球同步直播。
雙十一光棍節一向係阿里巴巴年度盛事，每年旗下天貓、淘寶等等平台嘅商家都會大減價促銷，今年主席馬雲就決定搞搞新意思，喺雙十一節前一晚，即係11月10號舉行大型晚會，仲搵咗著名導
演馮小剛執導，全球同步直播喎。
呢場晚會暫時命名為「雙11春晚」，歷時4粒鐘，將會邀請多位大牌明星到場，以互聯網文化活力嘅節目做主打。
趙薇章子怡或出席
華華估計，同馬雲老友鬼鬼嘅趙薇、章子怡等等都會出席。據聞9月底，阿里就會為晚會舉行商家招標大會，相信到時候就會有更多細節披露。
查實馬雲同馮小剛一向老友鬼鬼，馬雲仲喺2010年帶挈過馮小剛炒股贏大錢，所以舊年6月馮小剛旗下嘅電影公社正式開幕嗰陣，佢特登公開向馬雲表示謝意，話身兼華誼兄弟董事嘅馬雲，令佢認識電影產業係乜東東。
「當年我們相遇，馬雲給我畫了很大的餅，他說，你用1,000萬買華誼兄誼的股票，我會讓你翻10倍20倍，我以為他開玩笑，現在都夢想成真了。」當年馬雲、馮小剛等8位名人股東，合計套現近2,450萬股以上，而按照當時華誼兄弟股價計算，8個人套現金額合計超過7.71億元人民幣。
舊年雙十一節阿里就刷新咗單日成交量歷史新高，總共錄得571億人民幣，之後帶動阿里股價一口氣衝咗上120美金歷史新高，唔知今年雙十一可唔可以再做一次股價催化劑，救救喺招股價68美金附近徘徊嘅阿里、救救股民呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
