笑到最後：
樓市跌唔關自由行事
9月14日，本欄推介中外運（598），當日開市價3.99元，目標價睇5蚊，捱咗半個月價，近日終於守得雲開，上周五一度衝上4.88蚊，推介至今最多升22.3%，收市報4.67元，算係跑贏大市，當然同嗰啲細價、創板、半新股冇得比，但總算食到少少個反彈浪。
雖然未到價，但世上冇幾何畀你食盡曬個價而走人，特別係今年經歷過股災，所謂世事無常，你以為A股上硬10000點，佢一樣可以跌穿3000點，保本比起任何其他策略更重要，以免跌到低位冇錢入市撈貨。
五中全會有憧憬
所以本欄建議，今日開市價先沽一半，到5蚊全數沽出，一旦唔到目標價，市況逆轉回落到4蚊，就全數打靶，至少都有一半貨係賺住走。
本欄相信，今個星期仲有得炒，因為下個星期開五中全會（上個星期收錯風估錯開會時間，sorry），今個星期點都會有憧憬，不過，恒指低位反彈2,699點，呢個時候再博，冇9月時博咁有利。過往年尾一般個市都會升，但係：一、下半年最靚反彈浪就係10月，可能已預支升幅；二、市場對五中全會憧憬甚高，從來「阿爺」有好消息公佈，就係隊啲貨畀你接。與其冒呢啲險，不如將錢落咗袋先，然後升勢持續先至再跟囉，笑唔到最後，都笑到今年尾先啦。
上個星期六，蘋果財經頭版寫專家覺得樓市難大跌，原因係澳門賭業不振，賭業又佔澳門GDP約八成，所以令樓價2014年4月高位至今年8月下跌36%。以同期濠賭股，例如銀娛（027）計，舊年4月底收59.7元，今年8月底報24.71元，跌58.6%；同期澳門博彩收益亦都跌40.58%。澳門樓已經算跌得唔多。
奇怪，好似之前有人話過香港搞「佔中」，令到十三億中國人不高興，所以「阿爺」要懲罰香港，例如削減自由行之類，本欄對此表示支持。反而澳門咁「乖」，竟然被「阿爺」嚴懲，真係唔知「乖」嘅定義係乜。此乃後話。
中國自由行影響澳門賭業，套用喺香港就係旅遊業。根據今年財政預算，旅遊業佔香港GDP5%。自由行廢武功，八成GDP來自賭業嘅澳門，損失36%嘅樓價，若果用正比例去計，半成GDP來自旅遊業嘅香港，樓價會損失2.25%。而中原指數由9月頭高位146.92已調整1.6%，即係話跌到落143.6點，就反映曬自由行跌幅。當然，以上只係一個粗略估計。不過，失業率仍然係3.3%，同時，建造業加薪冇一成請唔到人，大跌真難少少。
香港樓市可能見咗頂，但即使將來掉頭下跌，元兇都唔係自由行囉！
即上偶像派財演高明專頁：https://www.facebook.com/bigricetea
高明
本欄逢周一刊出
高明
笑到最後 - 高明 舊文
