智取大市：市賬率價值陷阱
由於從價值投資法嘅角度去睇，股價最直接受到盈利同派息影響，所以分析盈利能力時，市盈率通常最先使用。盈利唔係固定嘅數字，會隨住好多因素而改變，當盈利變得不可預測嘅時候，市盈率功能就會大大減低，到時就會用市賬率去計算估值，去彌補市盈率嘅不準確度，原因係資產價值
，往往係比盈利變化得更少嘅因素。
市賬率係股價除以每股淨資產，係用嚟量度主力利用資產去賺錢嘅公司，包括地產股、銀行股同資源股。
假設有一隻地產股，佢選擇喺樓市高峯期喪推新盤應市，樓市跌就收埋曬唔賣住，佢嘅收入同盈利模式變得有很大選擇性同波動性，你見市盈率3倍覺得呢隻地產股好平，後尾發現原來佢之前一年已經散盡家財，將所有能賣嘅樓賣曬出去。之後嗰年冇樓賣，變咗要蝕錢，咁你喺5倍市盈率買呢隻地產股，就隨時輸到你儍，因為佢跌到市盈率3倍都可能仲係貴。你用市賬率去計算估值，就可能發現呢隻地產股係overvalue。
壞賬拖低資產值
市賬率對於銀行股嚟講，亦係一項最常用嘅估值標準，原因正正係銀行股倚賴資產去賺錢，收入波動性偏高，同時成本又未必跟隨收入上落，令銀行盈利變數好大，所以用市賬率為銀行估值，往往較恰當。銀行嘅市賬率，傳統嚟講一定高過一倍，原因係傳統銀行業務穩賺不賠，輕易地每年為資產增值。
近十年銀行賺錢的玩法變得太多，玩玩嚇可能玩謝埋自己，監管亦越來越嚴，壞賬亦越來越多，有唔少一次過抵銷全年盈利、令資產值大幅削減嘅風險出現，可以令銀行市賬率低過一倍。
渣打（2888）係一個非常好嘅教材，以有形資產計算，佢嘅市賬率遠低過1倍，低估值並不是反映佢好抵買，而係反映市場憂慮渣打嘅資產嚴重惡化，會形成大量壞賬，可能令每股淨資產大幅度削減，今日市賬率遠低過1倍，聽日撇賬後，股價不變，資產值大減，隨時令市賬率變成2、3倍，咁計就一啲都唔平。
雖然資產價值係遠比盈利穩定嘅數字，但係喺銀行高槓桿之下，資產安全度亦值得留意。如果眼見某間銀行嘅市賬率超低，就反映市場極度憂慮佢嘅資產安全度。單睇數字就覺得平，然後瞓身去買，就隨時誤中價值陷阱。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
