金融High Tea 2015年10月27日
再等低位入貨
2015年10月27日
內地雙降，中港股市同樣出現好消息收割，港股一爆上即刻觸發食胡潮，指數好快回落，中午已經打回原形，全日輕微低收。從過往經驗，內地減息降準都係期待以久的事件，最後成事時會引發沽貨潮，令個市有較深的回吐，昨日大市調整幅度已經唔算多，投資者如果想買貨，可以再觀望呢兩日有無機會回得深啲。
「妖股」續受打壓
內地開閘放水，雖然好多人話內地通脹持續回落，仍有好大空間放寬銀根，但好消息出貨乃係炒股最實用心法之一。央行雙降早在預期之內，加上兩地股市先前都已經造好，所以滬深兩市高開後反覆下挫，最後上證指數保住有進帳，收報3429點，升17點，升幅0.5%。深成指數收報11687點，升84點。要留意係創業板指報2527點，跌10點，不少內地炒作厲害的「妖股」都回落。睇番依家好多創板炒股市盈率又飆返上過百倍，相信阿爺都會繼續壓番住過度投機。阿爺唔想個市插之餘，亦唔畀佢亂炒。
喺雙降之後，消息又回番去十八屆五中全會，今屆大會焦點在人事調動，政策方向會繼續走向國際化、市場化同規範化，估計唔會有好驚天動地的政策刺激。不過，中央會繼續力推市場同金融改革，包括人民幣改革等。喺呢啲大政策下，兩地股市唔同板塊都會跟消息炒作。
昨日港股低收幾十點，陸羽仁對好消息下個市唔升全無意外，反而覺得回調幅度唔係咁大，唔知咁究竟係市底好轉跌唔到落去，抑或呢一、兩日會回深啲。從短線買股角度講，投資者都係等佢再調深啲，候低買大股，走吓波幅。
內地減息，內房內銀走勢略異，由於息差收窄，內銀表現稍為偏弱，內房就造得稍好。雖然個市回落，但內房普遍都保持堅挺。雖然內房暫時未跌，但如果個市真係要調深啲，咁唔排除佢遲一步都會跌，呢個亦係我叫大家寧願耐心守候、不要高追的基本睇法。
萬科可炒波幅
好似我成日講嘅萬科企業(2202) ，喺好消息下昨日最高上過19.48元，最後回番18.56元收市，升2.4%。佢之前股價較低迷，咪話17元樓下咁低(好多機會入到)，即使17.5元入咗貨，目標睇一成，昨日開市前掛個19.25元去沽，已經有一成利潤落袋，短炒已經相當唔錯。唔好睇隻股可以去到邊，入得稍平，肯定個位去食胡，仍然可以搵番三茶兩飯。
呢排我成日講，大家要適應?家變番大型上落市的格局，唔可以記住幾個月前狂升的好日子，以為會大升特升，死揸不放，要隨市而炒，好似萬科呢類大企，最好等佢回深少少就入貨，高位就食胡，唔可以太貪心，唔好仲成日諗住食爆棚滿胡。因為?家唔係狂牛市，有幾個巴仙密執，就已經相當好啦。當然要炒波幅亦唔一定要睇萬科，可以炒波幅的大股唔少，個個人自己有心水，打穩陣波等回吐深啲才買，同時定番一成止蝕。
具體市況方面，恒生指數收造23116點，跌35點；國企指數收報10747點，升5點，成交728億元。市場擔心內地降電價，電力股沽壓巨，華潤電力(836) 跌4.8%，報18.52元，為表現最差藍籌。
中海股東收禮笑呵呵
新股中國再保險(1508) 首掛，收報2.7元，與招股價相同。由中國海外(688) 分拆派送的中海物業(2669) 第二日掛牌，勁升27%，收1.35元。
中海物業是中國海外旗下的物業管理公司，過去兩年盈利分別為8500萬同9700萬元，物管股票收益穩定，加上阿媽係內地主要發展商，項目以中高檔為主，前景應該唔錯。由於股份係免費派送俾股東，每三股送一股，若以現價1.35元沽出，計番條數等如一股中國海外收咗0.45元，沽貨套現等如收1.7厘特別息，股東收到禮物都好開心，以第二日成交有6億元，交投咁活躍，似乎唔少股東都折現落袋。
陸羽仁
金融High Tea 舊文
