中環在線：
沈嘉偉搶高檔客 I.T進駐置地
■走貴價路線嘅大I.T，日前正式喺置地開舖。 李家皓攝
本港零售業疲弱，沈嘉偉旗下服裝潮牌公司I.T（999）上周公佈嘅中期業績，認真麻麻，香港業務仲錄得上市以來首次經營虧損，不過沈嘉偉似乎心口掛個勇字，繼續開新店，剛於上周六喺中環置地廣
場開咗間專賣潮牌男裝嘅I.T（俗稱大I.T）。
平時好多闊太喺置地嘆下午茶與濕平，商場裏面嘅零售品牌全屬一線大牌子。華華噚日路過，見到新開一間專賣男裝嘅I.T，舖面唔大，大約1,000方呎，服裝售價幾千至過萬元都有，原來呢間店都係第二日做生意，不過噚日中午就冇乜人行。
無懼淡市照開店
I.T在港經營約260間舖，唔同品牌走唔同路線，開喺唔同嘅商場或地區，好似大眾化商場就多見5cm、b+ab同i.t（俗稱細i.t）。
I.T投資者關係總監方衞斌（Benny）話，進駐置地廣場對公司有一定代表性，「大I.T」專賣相對貴價嘅潮牌服裝與配飾，乃公司在港第10間「大I.T」，喺其他高檔商場，好似太古廣場、圓方亦有分店。
翻查資料，呢個舖位嘅前租戶係意大利時裝名牌CoSTUME NATIONAL，2012年開業，產品價位過萬元。
Benny唔肯透露新店月租幾多，只係話「傾到條件，大家覺得啱就開囉」。佢承認，本港零售市況係幾差，但I.T會繼續好有策略性咁開店，簡言之「有開，亦有閂」。咁都啱嘅，公司上半年在港錄得經營虧損9,100萬元，如果唔想單靠減價促銷，就要從分店網絡諗計。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
