人仔猛彈
2015/11/02 07:59:33
網誌分類: 經濟
外圍股市上周無大變化，美股上週五輕微收低，杜指跌92點，收17663點；標普500指數跌10點至2079點，跌幅都係0.5%。全個星期計，杜指及標普500指數基本原地踏步，市況呆呆哋。
內地股市上週五跌4點至3383
點，全個星期跌0.2%，變化亦係唔大，港股就弱雞好多啦，恆指原地踏步，收報22640點，但全星期跌咗2.9%。
內地股市平淡無奇，但人民幣匯價就風起雲湧，在岸人民幣匯價上週五就暴漲近400點，創2005年開展在岸交易以來最大漲幅，係8月11日匯改以來新高。人仔之所以大漲，原因係阿爺當日發布《進一步推進中國（上海）自由貿易試驗區金融開放創新試點 加快上海國際金融中心建設方案》，計劃在自貿區內率先實現人民幣資本項目可兌換；允許或擴大符合條件的機構和個人在境內外證券期貨市場投資；逐步擴大人民幣外幣兌換限額，拓展自由貿易帳戶功能、擴大人民幣跨境使用。彭博更引述知情人士表示，中國可能考慮在2020年取消資本管制。
內地今次加快金融改革，估計係為爭取國際貨幣基金組織（IMF）將人民幣納入其特別提款權（SDR），作最後衝刺。IMF將於今個月開會決定，明年10月1日正式啟用。人仔一旦成功納入SDR，將有更多國家願意使用人民幣、將人民幣用作外匯儲備。據渣打銀行預計，將有至少1萬億美元的國際儲備，轉為以人民幣形式存儲。對人仔匯價會有好大的支持。
此前，彭博新聞社曾經援引三位知情人士稱，IMF代表向中國發出了強烈信號，人民幣好有機會納入SDR貨幣籃。不過，由於美國及中國在南海問題上愈鬧愈僵，關係緊張，而美國在IMF的影響力唔細，美國將成為人仔納入SDR的最大變數。以目前情況估計，成功的機會大約只有七成。
固然啦，人仔成功入籃，對大市起到支撐作用。特別係海外業務比較多的中行（3988），生意增加，股價又會做番好啲。
另一個影響大市?因素，就係阿爺會唔會紀繼續放水啦。內地日前公佈10月官方製造業PMI為 49.8，，與9月一樣，係年內第二低值，低過預期的50；而10月中國非製造業PMI為53.1，低過9月及8月的53.4。數據唔係咁理想，不過睇5個分類指數，當中的生產指數52.2%、新訂單指數50.3%及供應商配送時間指數50.6%都高過臨界點，其餘的從業人員指數47.8%與原材料庫存指數47.2%仍低於臨界點，但有少少企穩?跡象。正如一些分析認為，中國製造業PMI沒有更壞的消息，就是好消息，預計對大市的衝擊唔會太大。
另外，由於內地實際利率依然較高，通脹及PPI下行又超出預期，阿爺仍有繼續放水空間，市場憧憬阿爺仲會減息、降準，大市又唔會衰得去邊。
陸羽仁
回應(3) 我想回應
陸羽仁 BLOG 舊文
