新經濟 VS 舊經濟
2015年11月02日
我們處於一個銀紙好多，但投資市場動盪的年代，好嘢不便宜，便宜嘢有缺陷。但有缺陷的東西也不一定會一直跌，跌得多來一個反彈，也可以彈得很驚人。
以今年10月份的港股表現為例，經過8、9月大跌，10月來一個像樣反彈，全月恒指累升1793點，
升幅8.6%，終止連續5個月的跌勢，結束自2002年9月來最長的跌浪。
港股很有熊市反彈的味道，反彈最甘美的部份已完成，但只要外圍不出好差的變化，仍然有可能反覆再向上彈，不過唔好期望個個月都升咁多。
周日，中國公佈官方10月製造業採購經理指數(PMI)49.8，和9月持平，是年內第二低，市場預期是50。經濟差本身是利淡消息，但亦觸發放水預期。另外本月國際貨幣基金會是否同意人民幣加入作特別提款權儲備貨幣，市場預期有機加入，會短期支撐大市。 總結10月份藍籌股走勢，以濠賭股表現最好，銀娛(027) 和金沙(1928) 10月份分別累升35.3%及20.8%，遠超過恒指的8.6%升幅。不過睇睇銀娛個3年圖就知(見附圖)，即使近期升番唔少，仍然處於一個大熊市中。銀娛由去年頭高位84.5元，呢一年多一直跌，插到9月低位19.02元，依家彈番上26.65元，睇一個月好似升咗好多，睇三年圖仍在完美的熊市中。我平時在這裏講股，多數講一個中長線走勢，所以一直睇淡濠賭股，但在一個長熊的走勢中，經常有一兩個月反彈，可以彈番唔少。好似濠賭股，博反彈考身手睇眼光，有時跌得多會出現走短線博反彈的機會，但長揸就咪制。
小賭王︰貴賓廳高峰永不回頭
新濠博亞(6883) 聯席主席何猷龍講了幾句警句，佢旗下的新濠影匯上周開張，為澳門首個沒有貴賓廳的大型賭場，只有中場賭枱。何猷龍不看好貴賓廳前景：「唔會去番貴賓廳2、3年前的高峰，其實那時是一個泡沫，我覺得永遠不會去番當時的高峰。」
記住佢講係「永遠」，即係話呢個貴賓廳泡沫爆咗，永遠不會回頭，大家都知澳門賭場的貴賓廳係內地豪客甚至貪官的英雄地，小賭王講到「永遠」不會回頭，去到咁盡，估計係睇到阿爺唔會再放咁多人落嚟咁樣賭、內地經濟放緩影響豪客的賭資，或者打貪令貪官無錢或唔敢落去澳門賭，可能三個因素皆有。經濟循環的原因可以回頭，結構性的改變就不會返轉頭。新濠影匯本來想爭取開400張賭枱，最後只爭到250張，而且到最後一刻先至批，可見澳門政府都想控制一下賭枱供過於求。
照小賭王的講法，愈依賴貴賓廳的公司應該愈大鑊。瑞銀發表報告指出，濠賭股中貴賓廳業務佔EBITDA(除利息、稅項、折舊及攤銷前盈利)估計比例最高的是永利(1128) ，有24%，銀娛(027) 和澳博(880) 都好接近有22%，新濠博亞則為13%，美高梅中國好接近佔12%，金沙佔6%。
買新經濟小心泡沫
澳門賭業股最大問題係新場不斷投入，但生意無增大，開新場生意少不止成本大增，而且係互相搶食的零和遊戲。對濠賭股的中長線建議仍然係熊市持續，有貨者趁高要分段減持。至於短炒反彈者要睇位食胡，咁做未必賺得盡，但也可以避免死坐股份再跌時走唔切。
小賭王那句金句「永遠不會去番當時的高峯」，可以係萬能key，用嚟講好多嘢乜都得，例如話「內地豪客在香港100萬買隻名錶的日子，早在2、3年前已到高峰，永遠不會去番當時的高峰」，你換成買豪宅又得，甚至藥房生意的高潮亦得。如果早幾年內地客湧去港澳出現的是某種新經濟，呢個故事教訓大家，新經濟風險不低啊。
內銀增長似有若無
依家錢太多而好的投資機會少，舉世皆然。內地減息後一年期存款利率只有1.5%，買樓收租回報只是2%，香港定期存款更只有零點幾厘，回報太低，驅動資金投資股票。上期我講到內地投資者在中央放水下希望今次內地市是慢牛。我都希望內地係慢牛，但亦有少少擔心香港是慢熊，主要是香港股市舊經濟成份太多，新經濟成份好少，港股投資者當中，外國投資者比重甚大，佢哋特別睇淡中國的舊經濟股，搞到香港股市都有啲走樣。
中國產能過剩，銀行資金囤積又不敢放貸，相關企業成為舊經濟典型，變成一隻隻肥牛、呆牛，缺乏增長。睇吓四大內銀股業績就知。最新公佈季度業績的「巨無霸」工行(1398) 第三季純利727.4億元(人民幣)，按年微升0.5%，按季倒退2.6%。總結四大行第三季盈利增長不足1%，大型銀行盈利開始步入零增長時代，第三季業績極差主要受撥備影響。
比較四大行第三季表現，農行(1288) 盈利增長1%，在大銀行中最快；工行僅次於農行，盈利升幅0.5%居次席；建行(939) 第三季貼近零增長，險守0.04%的正增長；中行(3988) 盈利按年倒退1.5%，在四大行中包尾，亦為09年金融海嘯以來首次錄得跌落「負增長」。
前三季累計，工行錄得純利2217.6億元，按年增長0.59%。四大行盈利平均增長不足1%，料全年盈利將貼近零增長，明年內地大銀行的純利或面臨負增長壓力。大型商業銀行招行(3968) 表現較佳，招行今年第三季業績，純利按年升1.2%至155.2億元。累計首三季度，招行純利按年升5.9%至485億元，估計全年業績較好，但招行第三季盈利增長有放緩跡象。
基建股業績頗呆滯
不過三大內銀工行，建行、中行都係5倍市盈率6厘幾息率，農行更是4.6倍市盈率7.2厘息率。增長較佳的招行亦只是7.4倍市盈率，4.1厘息率。內銀派到6厘以上息，可以「息誘」股民了。
鐵路基建股也在受產能過剩影響，在低增長時代中，猶幸原材料價格低迷，第三季業績叫做平穩。中國中車(1766) 公佈第三季純利39.4億元，按年跌4.8%；今年首三季業績累計純利79.61億元， 按年微升0.2%，南北車合併的協同效應該未反映出來。中車現價9.93元，市盈率20.4倍，合併要有效才會拉低市盈率。
中國鐵建(1186) 第三季錄得純利27.8億元，按年升4.3%，首三季純利錄得81.14億元，按年升3.7%。現價11.68元，市盈率10.2倍，息率1.6厘。另外中交建(1800) 衰少少，第三季度純利按年跌10.6%，至35.3億元；首三季純利錄得100.57億元，按年升3%。現價10.72元，市盈率10倍，息率2厘。
中國雖然仲係死谷基建投資，但中國內地起路起橋起鐵路都起得七七八八，未來唯有睇「一帶一路」可以帶動幾多基建出口，佢哋生意前景好似好過內銀少少(都係好似，因為基建出口有幾成功的能見度較低)，但只計派息，內銀6厘息比交通基建股2厘息，內銀肯派高息，係唔係吸引過基建股，即使買增長較好息較低的招行，都有4厘喎？
騰訊買未來可以行多遠？
你可能話唔想玩舊經濟股，玩吓新經濟股仲好啦，但佢哋一啲都唔平，以股王騰訊(700) 為例，佢要等到11月10日才公佈第三季業績，睇番佢上半年，騰訊純利有142億元，比去年同期增長15%，單看第二季度，盈利同比增長27%。第二季純利增長加速中，不知第三季能否保持較高速增長。
但騰訊股價一啲都唔平，現價146.6元，市盈率45.5倍，息率0.25厘，你可以話睇科技股睇增長唔係睇派息，但45倍市盈率，假設全年盈利增長27%，可以將今年底市盈率拉番到35倍，問題1.38萬億市值咁大隻股，可以保持幾多年高增長？
舊經濟股無人吼，愈插愈低，科技股人人搶，愈炒愈貴。貴股愈貴，平股愈平。但若是長揸，一個平衡意見，可能舊經濟中的較優質股份，睇住業績相對好啲的股份，如招行，7.4倍市盈率，息率4.1厘，係唔係中線收吓息都好呢？ 當然呢的上落市，買股長揸，若買入無幾耐就有超過10%回報時，隨時可以先沽佢走一轉，呢啲時勢搵食難艱，食吓胡唔拘㗎。
陸羽仁
金融High Tea 舊文
