笑到最後：
尋找下一隻迪士尼
政府硬推「創科局」終於推得鬱，有幾樣嘢想借機講嚇。首先唔好怪人剪布，因為拉布同一招已經用得太耐，對家一定會諗辦法去對付，但係香港文化就係咁，同一招一定要做到爛先至開心，最經典就係有錢問答遊戲節目《百萬富翁》，亞視先播，紅咗，TVB（511）即刻頂爛市買第
二個同類節目，跟住亞視就改日日播，最後好短時間就做爛咗。不過，呢個節目外國仍然做緊。下次要諗拉布以外嘅方法，去對抗政府硬推。可惜高明並非從政，橋要由政治專家去諗。
好多人話「財技」呢個字「中性」，本來可能係，但因為一個字被乜人都用，久而久之就會變質，好似「和諧」已經係一個負面用字咁。點解無啦啦講財技？部份上市公司用「財技」將公司錢移到自己荷包，例如做啲多餘嘅項目，高薪請啲唔知乜人做管理層。但係玩「財技」最狼死嘅並唔係上市公司，而係現屆特區政府，高鐵超支、港珠澳大橋涉用劣質磗，如果上市公司有呢啲新聞，股價一早跌到嘔。「創科局」就係開職位請人入局，又係攞「股東」錢益自己友。
「創科局」要成功，政綱得三項，一、廢除「不誠實使用電腦罪」；二、永久阻止「網絡廿三條」立法；三、立法容許crowdfunding，打破港交所（388）壟斷香港集資渠道。梁振英呢類阿伯，如果佢同佢嘅「執政集團」有咁強嘅科網意念同執行能力，戴德梁行就唔會搞成咁。政府唯一作用，就係掃除法律同政策嘅障礙，但係政府咁對Uber，相信「創科局」只係「財技」，唔好諗多咗。
遊戲改編電影新出路
講起科技股，近期有一隻股份再次引起高明注意，呢隻就係遊戲製造商Activision Blizzard。點解無啦啦講美股？因為旗下公司Blizzard Entertainment將遊戲Warcraft改編成電影，啱啱喺11月6日發佈宣傳短片，本來今年年尾上畫，但要避開星戰，所以改下年1月上畫。
拍戲係少數「知識產權」產品可以收到實錢嘅方法，Activision Blizzard喺2006年已經構思拍戲，但到今日先出街實在太遲，人哋迪士尼已經玩咗好幾十年，連公主都已經被迪士尼重新包裝為Frozen，Blizzard反應明顯太慢。
迪士尼2011年尾講緊37.5美元，上周五已經係115.69美元。卡通、電影、衍生零售產品，再加全球發行能力，已經被迪士尼證明係「行之有效」。Blizzard只係將卡通改為遊戲，大橋冇變。今年Activision Blizzard已經升咗73%，好似好多，但如果電影成功，股價走迪士尼舊路，上個星期五回落應該係好消息出貨，但長遠睇，應該不問價買入，然後擺埋一邊，博買中下隻迪士尼！
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
