一周三件：中傳動兜番轉
■中傳動今年半年盈利大增近兩倍。圖為集團主席胡曰明。 資料圖片
市場吹風阿爺或降風電電價，震散風電股，但環保國策無變，加埋環保係全球需求，尤其配套裝備商得米。場內中國高速傳動（658）明年得8倍幾PE，趁呢期股價質得深，兜轉。
受惠國內外需求
國家能源局要員呢
期講，到2020年，非化石能源佔總能源消費比重15%，係「硬約束」。據估計，阿爺要達標，風電呢瓣，除會著手解決棄風限電、爭建火電等問題，亦會keep住新增風電機組。之前嘅target係，到2020年時，併網風電裝機容量要去到2億千瓦。而國際風電權威GlobalData亦預計，2020年時，全球風電市場規模將超過900億元。
阿爺環保方針無變，全球對風電瓣數有需求，而中傳動又係祖國最大風力齒輪傳動設備商之一，而單喺上半年，連同其他產品瓣數，集團喺美國銷售額達近9億銀人仔，海內外逢源，中傳動掂過碌蔗。
中傳動今年半年盈利5.24億元人仔，大增近兩倍，兼超過上年全年盈利2.1億元人仔。而集團全資附屬南京高精傳動，啱啱派今年頭九個月成績單無耐，盈利上到10.2億元人仔，一枝箭增長咗4.3倍，中傳動母憑子貴，今年張成績單靚仔到痹。
場內專業評估，中傳動喺自然增長下，今、明兩年EPS0.71元同0.76元，現價（6.8元）明年預測8.9倍PE，比本身上市以嚟平均26倍PE，又場內行家明年平均23.5倍PE，平咗60%有多！煲中傳動，當去到大摩本月頭新鮮熱辣目標價9.78元，中傳動要升44%，明年預測12.8倍PE，未有耐追到行家平均水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文
