加息週期
2015/11/09 09:14:36
網誌分類: 經濟
美國加息機會大增，迎來環球金融市場大變局。美國上週五公佈的10月非農就業新增職位27.1萬個，遠超過市場預期的18.1萬個，亦從9月份的14.2萬個大幅跳升，失業率亦由5.1%微跌至5%，同樣高過預期，而平均時薪提高了9美
分，美國就業市場出奇地好呀。
由於聯儲局加息決定主要睇就業和通脹，就業數據大好，連比較鴿派的芝加哥聯儲主席埃文斯(Charles Evans) 都話，就業強勁增長將有助於提高通貨膨脹率，令到市場對聯儲局於12月開始加息的預期大升。而聯邦基金利率期貨顯示，市場預期聯儲局於12月加息的概率由此前的58%，大幅抽高至70%。
加息對股市通常都係壞消息，但美股上週五表現非常硬淨，標普500指數跌唔夠1點，收報2099點；杜指更反敗為勝，午後由跌轉升，收高47點至17910點；納指亦漲19點至5147點。
投資者跟住加息做反應，將資金投入因升息受益的資產，以及削減對無法受益資產的投資。10年期國債息升上2.33厘。股市方面，加息有利息差擴闊，對銀行盈利有利，標普金融股指數上揚1.1%，對於息口比較敏感的公用股沽壓沉重，大跌3.6%。
對於美國點解冇俾加息預期升溫打沉，有分析員事後孔明地解畫，美國就業市場強勁，反映經濟狀態良好，市場覺得可以頂得住加息的壞影響。另外，也有交易指出，市場已留意到中國的消費正在轉強，歐洲經濟正在改善，而美國的房地產市場及汽車市場表現強勁，對全球經濟，特別係中國「硬著陸」的憂慮已經大為減緩，中國定出未來五年經濟增長的目標6.5%也穩定人心。這意味著此前跌得好殘的股份，例如金融股，股價又顯得比較吸引，資金流入呢啲板塊，支撐著大市。
我覺得大市唔跌，與退休基金及互惠基金經理「持股慢慢睇」的心態關係更大。年近歲晚，基金經理雖然見到12月聯儲局加息的可能性大增，但美國經濟表現有好轉跡象，貿貿然沽貨，豈不是搞壞自己的成績表？芬佬個個忍手，唔做第一個沽家，抱住盡量坐貨的心態，大市沽壓就細好多啦。
港股就軟軟地，喺美國預托證券市場ADR港股比例指數較香港收市再跌0.4%至22770點，港股係略調整開局。
港股今年唔係好驚，但要小心美國係開展一個加息週期，若然如此美元會繼續走強，明年資金可能會再流出包括香港在內的新興市場。過去股災之年，往往由美元大幅轉強開始。
陸羽仁
回應(3) 我想回應
陸羽仁 BLOG 舊文
