彈高即食胡
2015年11月18日
美國股市在歐洲恐襲後不跌反大升，基本上收復上周五失地。大戶愛玩相反理論，外圍炒上，港股開市又夾一夾，夾完之後好友食胡，升幅又收窄番，足見有食要食，乃當今最流行趨勢。
美股隔晚大升，有中環茶友覺得人為味道幾濃。佢話，美國每遇到有恐襲事件，股市都有無形之手力托，唔俾個市跌落去。
有分析話係「九一一襲擊」時，恐怖大亨拉登在撞毀世貿中心前，同時部署咗喺華爾街沽空，當美股受驚下沉，恐怖大亨就籌到大筆資金用來打聖戰。
每遇恐襲即刻夾高
美國政府知道後，每逢遇有重大事故，就會有股市特攻隊維持秩序，呢次巴黎恐襲咁大單嘢，可以估計美國政府必然啟動特政隊出動，唔止頂住個市唔俾佢跌落去，仲出力夾佢上去，博夾死恐怖資金。
茶友講法好似電影橋段，不過在座無人駁到佢。如果唔講外圍只講香港，魔笛上星期唱好港股，搞到指數爆升幾百點，點知遇着美股跌市，搞到大戶炒上遇阻，昨日咁啱跟住遇到美股大力爆上，仲唔加把勁推個市上去咩，所以一開就見個市迅速攀上高點，夾咗一輪先軟番落嚟。港股收市近253點，但十天線(22487) 得而復失，恒生指數收造22264點，升253點；國企指數收10073點，升94點，成交739億元。
個市先升後穩，但炒個別的色彩都幾濃厚，有不少股票逆市創一年低價，好多過去炒到好好的股份都唔掂，見到市場炒作資金較缺，小部份企得好硬，呢排大市有限資金流向電池同電動車概念，做開電池嘅天能動力(819) 繼續走高，收報6.17元，升咗差不多5%。天能過去兩年大力拓展產能，加上產品需品回升，盈利開始進入上升軌。資料顯示主要股東有喺3元以上水平曾經密密手增持，不過最近已經停手，而低價買入的股價差不多已經翻一番，成為今年的大贏家之一。
深圳系股份有表現
另一組升勢靚仔的是我之前介紹過的深圳股份系列，深圳國際(152) ，收報13元，升咗2.6%，係近日高價。自從佢宣佈前海地塊補地價改變用途後，股價反覆上升。同屬深圳概念的深圳控股(604) 都升得唔錯，昨升2.9%。深圳樓價今年表現強勁，當地政府已表示關注，但內地政府對於樓價向好唔會太過有敵意，因為土地有價對籌措政費助力好大，故此深概股能夠跑贏大市，相信係內地持續放水下，呢兩隻股表現有條件會好過其他內房股。
近排阿里巴巴喺海外遇到唔少麻煩，剛出版嘅《福布斯》11月號，就以阿里巴巴集團創辦人兼董事會主席馬雲作封面，標題為「Unstoppable」，副標題大家講「His $200 Billion Empire Is Built Atop A Mountain of Fakes」，直指其2000億美元電商王國，建築在一眾冒牌產品之上。從《福布斯》呢個姿態，可以估計阿里被人砌，只係麻煩的開始。
早前法國奢侈品企業開雲集團(Kering SA)旗下多個奢侈品品牌，起訴阿里的網購平台賣假貨時，當中包括Gucci(古馳)和YSL(聖羅蘭)等。訴訟質疑，阿里及其關聯實體為造假者「提供在線平台廣告及其他所需要的必要服務」，要求法院發佈指令，阻止阿里提供或協助假冒產品銷售，並尋求賠償。
今次《福布斯》派出記者向淘寶商戶「放蛇」，證明商家收定單要求抄襲正貨設計。對於訴訟，阿里主席馬雲明言要打官司打到底，外界估計不少品牌商都注視阿里點樣應付官司，若然阿里同意和解，可能觸發其他品牌商一擁而上，故此阿里只有企硬一途。而家《福布斯》咁樣發炮，對阿里自然不利。不久前，有消息話馬雲洽購香港的英文報紙，唔止佢係咪知道傳統媒體影響力終終好重要，所以買番份報紙「傍身」呢！
陸羽仁
金融High Tea 舊文
