魚樂無窮：突然破位大龍鳳
■股份橫行一輪再爆上，往往有好消息跟尾。 資料圖片
春江水暖鴨先知，橫行一輪再爆上，往往有好消息跟尾，但尋常散戶唔知頭唔知路，炒作也只能從圖表出發，睇住技術位操作。相反，如果有齊背景、人物及故事大綱，買起上嚟就更得心應手，今日推介嘅佑威（627），劇本已接
近完成，一旦上畫，票房肯定爆曬燈！
佑威10月時公佈，收購內地房企福晟旗下六項位於湖南省長沙市嘅物業項目，總代價19.4億元，將透過發行新股、換股債及現金支付，新股發行價0.22元，換股債換股價則為0.18元人民幣，交易完成後，福晟主席將持有佑威50.99%股權，變相借殼上市。
福晟呢個名你未必聽過，但其實在內地大有來頭︰成立短短12年，已升呢為內地房地產百強，業務涵蓋地產開發、建築施工、金融等等，遍佈全國十多個省市。最新總資產達250億人仔，佑威呢？最新市值只得7億，只及福晟2.8%，呢壇注資傑作，用計數機都計唔掂。
雖然是次反向收購，其後被定為新上市申請，但佑威竟然在連日跌市下突然破位，打破近兩個月嘅橫行悶局，絕對值得尊重。四日累升四成，噚日稍作回吐，話唔定係最後上車機會，只要突破0.6元大關，下一站直指今年高位0.9元，屆時市值都只係得12億咋陰公！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
