貨唔平唔買
2015年12月18日
美國聯儲局宣佈加息0.25厘，美股好似鐵打咁繼續上升，搞到中港股市都跟住造好。不過，港股始終係底子弱，早段抽高後就升幅收窄。
聯儲局加息唔意外，市場焦點係跟住點走，結果聯儲局主席耶倫畀出一個鴿派利息預期，聯儲局議息聲明中表示，預期經濟活動的發展情況，只會令聯邦基金利率和緩上
升，這已經是現實上最鴿派的說法，正如債王格羅斯的理解，聯儲局雖然唔會一加即停，但這種說法已等如「加兩次再睇睇」。
地產股仔陸續抽水
同美國相比，香港息口表現仲軟。雖然金管局即時跟隨美國調高香港「貼現率」，但由於銀行結餘有3900億，但銀行公會多數唔會跟住加息，有銀行界講到除非出現急劇走資，否則香港可能未來大半年都唔使加息。政府本來想美國加息再遏一遏樓市，但銀行公會唔郁，本地按揭利率至少短期都唔會跟，估計發展商短期都會借機會出一輪貨先。
雖然美股亢奮，杜指連升3日，內地上證亦高收1.81%，港股飆逾三百點，觸及兩萬二後就腳軟，恒生指數收造21872點，升170點；國企指數繼續跑贏恒指收9666點，升127點，成交增至767.5億元。聯儲局十年以來首次加息，銀行股表現突出。渣打(2888) 獲大股東淡馬錫力撐，股價重返60元關，全日揚8.6%，報61.85元；匯控(005) 全日升2.8%，報61.8元；東亞(023) 揚3.6%，報27.45元，為表現最佳藍籌股。
聯儲局加完息之後放白鴿，照計港股應該會好啲，佢跟唔上外圍升幅，只能話上日升咗，加上本身底子較弱。雖然係咁，美國加完息至少有段時間利率問題叫做明朗化，股市懸劍暫時放低，若然內地有好消息，唔排除個市會再彈吓，散戶策略係見個市回吐去低位就買吓，博佢反彈就食胡。
七年的低息期結束，無論美國加息快慢，資金供應慢慢回復正常化，已成為政策趨勢，所以呢排有幾間地產公司都宣佈供股集資，相信管理層都係希望減定債，好似之前有麗新發展(488) 2供1，呢個星期又到興勝創建(896) 宣佈照辦煮碗2供1，每股供1元，較宣佈前收市價1.26元折讓20.63%，集資3.39億元，淨額3.32億元。呢次抽水主要或專門用於減低集團物業發展及物業投資部的槓桿比率，餘款撥作一般營運資金。
睇興勝今次集資三億幾元，佢唔夠半年前先用7億沽出手頭物，用10億元買番件長沙灣工廈，如果佢唔換貨，根本唔需要集資，可見管理層都係覺得有水抽就抽定先，以佢供股價同市價折讓唔算太誇張，看來亦都唔怕平股無人供。
呢種做法唔不排除未來陸續有公司跟隨，換言之，即係未來仲有好多機會供平股、買平股，所以就算想入貨，都唔使心急高追啦。
Ticker投資App好使好用
另外想講講我搞了一個投資App(手機應用)叫Ticker，登上蘋果手機應用商店本周的「最佳新App榜」首位。
市面上有好多財經App，主要是睇股價，但我自己不是密密炒作之人，很多時只想睇睇股票投資組合的整體表現，要逐隻股票去睇報價，有啲煩；要上網登入證券行戶口睇組合表現，又要搞一大輪，所以自己搵人搞個App，方便我呢啲心急人。
用咗Ticker呢個App後，可以用「投資組合」概念買股票，好似基金經理咁，用管理一個組合的方式買貨，唔係只睇買一隻股的回報，係睇整個組合的回報與風險。仲可以設立一個「投資的我」組合，一個「投機的我」組合，自己比賽吓兩個組合邊個回報邊個高，非常之正。大家不妨去下載個App試試。
陸羽仁
金融High Tea 舊文
來源 source: http://hdfin.stheadline.com
