魚樂無窮：重溫績優孖寶兄弟
■東瀛遊中期盈利爆升1.6倍。 資料圖片
港股冬至日成交淡靜，但細價股鑊氣不減，中建置地（261）發通告，央企新興際華集團旗下新興鑄管，擬斥12億入主。地位有望幾何級數跳升，加上條街冇嘢好炒，自然成為市場焦點，埋單喪升七成，成交3億銀，多過滙控（005）1
億銀！參考耀科（143）升足三日仍然有心有力，中建置地應該未收夠籌，愛短炒嘅戰友可密切留意。
嫌炒味太濃驚驚豬？冇問題，大家有玩facebook嗎？佢哋周不時會重推啲舊相畀大家再share，今日唐牛照辦煮碗，畀兩隻績優股你重溫，值博率卻不減當年。
第一隻，東瀛遊（6882）。中期盈利爆升1.6倍至8,444萬，相當於去年度嘅113%，全年業績肯定又報喜。上月有報道指，聖誕歐遊加價近兩成，日韓團費平均亦加一成，東瀛遊下半年業績，沒有最勁只有更勁，唔好忘記，公司目標派息比率起碼五成，年度化計股息率接近四厘，如此有升有息，值得買定等好消息。
第二隻，嘉利國際（1050）。今年重點推介，近日連升兩棍，但市盈率只係11倍，息率超過8厘，依然超值。點解突然異動？原來中期業績透露，公司與大股東共同將廠房地改為住宅項目嘅計劃，月底前應有update，話唔定好事近，無論短炒定長揸，水位十足。
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
