守株待兔買匯豐
2015年12月23日
冬至天氣暖洋洋，只是股市交投就凍冰冰，中港兩地股市都係下半場回升，市底睇嚟唔弱，結果港股微升38點收場，收報21830點；國企指數收9731點，跌15點，成交得番483億元，甚有提早收爐味道。
大市買賣兩閒，加上美元強勁，外遊港紙見使，好多投資者索性提早放假，去海外散吓
心。經歷波濤洶湧的2015年，好多人覺得不如早點放假，輕鬆一吓。喺咁淡靜市況下，好多藍籌成交變得零星。有中環茶友留意到，傳統12月成為股民寵兒的匯控(005) ，竟然20大不入，股價亦無升無跌，收報61.1元。
兩年收息12.7厘
早兩日我講起有人建議低吸匯豐，茶友睇完好有興趣，話以前有「聖誕鐘、炒匯豐」之說。昔日，好多人過年前後收到花紅，想穩穩陣陣買股票，好多都會考慮匯豐，皆因以前匯豐年年有增長，年尾入貨等到翌年公佈靚靚業績，咁就可以沽貨收割。可惜呢支歌近呢十年都無得再唱，因為匯豐喺海外輸到焦頭爛額，業績公佈唔再係好消息，所以年尾買匯豐都變成輸多贏少。
有人建議依家可以再諗吓買匯豐，我覺得呢個建議反映市場無乜好的增長股選擇，所以寧願買6.35厘派息的大笨象，貪佢派息夠防守性。
對於呢個建議，中環茶友話買高息股最緊要睇佢派息能唔能夠維持。佢同銀行家老友傾過，覺得匯控海外業務整頓咗幾年，要執都執咗，基本上規模已經大減，依家匯控基本上可以話係香港盈利為主的銀行，管理層都做得唔錯，所以除非大風大浪，否則香港業務點都應該交到成績，故此維持派息能力睇落唔錯。
照茶友計法，如果以現價收息兩年有12.7厘，等如7.8元。如果以今年低價56.8元去買，死守兩年的話，就算股價跌穿50元都唔使蝕。
睇番昨日二十大成交，排第一係農業銀行(1288) ，市值同匯控差不多，但成交有12.9億元，足足係匯豐6倍，可見股民對佢興趣大減，幾乎變成半冷門股！匯控現時資產淨值76.86元，以銀行來說市帳率低過1倍，真係名副其實變咗大笨象，睇落大件夾抵買。
深圳公司多搞作
茶友話，匯控出現咁現象，好大程度係同觀感有關，亦令人有啲戥香港匯豐唔抵，由於佢定位係國際銀行，人家常常同摩通、瑞銀呢類頂級跨國銀行比，變成要買未必買佢；再者，跨國銀行估值其實唔夠香港銀行高，若然匯控分拆香港業務派俾股東，可能仲能夠反映公司價值，只可惜依家這些貴重資產就掩埋喺大量國際業務下面。茶友形容，買匯豐係守株待兔策略，用得呢招就要唔怕悶，依家吼佢再跌啲買嚟收息，或者可以搏等到有一日這些價值被發掘重估。
港股靜靜哋，估計假期前仍受外圍同內地影響。呢排內地股市表現不俗。上證指數收報3651點，微升9點，但就創四個月收市高位，全日成交金額3608億元人民幣。深成指數收報13139點，升110點。內地市似想挾高年結。
市場人士指出，本地大市近日輪炒藍籌與個別板塊，由於傳統的資金寬裕期即將到來，春節行情或漸次展開，投資者可能會活躍炒作。內地資金近日頻有搞作，而且與港股有互動。深圳交易所上市新興鑄管，擬斥資12億元認購中建置地(261) ，若交易落實，新興鑄管將奪得中建置地控股權，該股應聲爆上，收報0.034元，大升70%；中建置地主要股東中建富通(138) 飆升30.26%，收0.99元，可以話借勢短炒也。
陸羽仁
金融High Tea 舊文
來源 source: http://hdfin.stheadline.com
