中環在線：元老級公職王 出掌獨立保監局
鄭慕智殺入保險業
■鄭慕智累計曾任公職約40項。
今時今日提起「公職王」三個字，大家多數諗起形象討好嘅陳智思，或者越來越積極嘅劉鳴煒，未必即刻想起累計公職約40項、曾經喺財經、藝術、政治、康文、教育等界別都有公職嘅鄭慕智（Moses）。呢位
元老級公職王新近殺入保險業，成為獨立保監局主席。
現年65歲 任期3年
65歲嘅Moses正職係一間律師樓嘅合夥人，做過嘅公職多到數唔曬，佢近年相對低調，似係想讓路畀其他人做公職王。直到今年9月，銀娛（027）主席呂志和成立「呂志和獎」，搵咗佢做董事會成員，佢先高調番些少，呂志和仲搵咗前特首董建華做獎項理事會成員，據聞，Moses與董建華都幾老友㗎。
唔知係咪做開有條路，政府噚日宣佈委任Moses做獨立保監局主席，一個佢從來未掂過嘅範疇，即日生效，為期3年。
獨立保監局係保監處嘅升級版，前排立法會三讀通過之後，保監處嘅職能就會逐漸轉移到保監局，保險中介人（代理同保險）牌照同埋監管，都會由三個業內聯會，交番畀保監局管理，當中懲處機制曾經引起保險業人士反彈，所以Moses做咗呢個位，將來都可能唔係咁得閒。
不過Moses好識減壓，佢鍾意唱男高音，2003年同歌唱家莫華倫、呂志和千金呂慧瑜合組「香港歌劇協會」，亦曾經喺歌劇《杜蘭朵》參演皇帝角色，前財爺梁錦松伉儷都有捧場，政商界都人緣好。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
