金手指：各位賺夠好走
■2012年特首選舉，唐英年被政治「暗殺」，從此香港政治規則變天。 資料圖片
孫柏文估，喺邊刻李嘉誠決定「拆遷」，應是2012年特首選舉。根據一路嘅遊戲規則，嗰個唔係選舉，應該係唐英年嘅加冕。點知，唐英年被政治暗殺。規則變天。
周凱旋曾話：「香港人心態要變，因
我哋佔大陸GDP冇百分之三。」好多人鬧：「貶低香港！」錯。試諗嚇，80年代香港佔大陸GDP兩成以上、中央政治局常委日日聽香港briefing時，你估有冇人敢政治暗殺唐英年呢個皇儲？
地位被貶惹不安
地運，我介定為「域多利時代式殖民地」。兩周前講過，香港喺1840年被割，第一次行運。之後？倫敦冇headcount、budget，要你自生自滅，第二次行運。砵甸乍因而定下三條天條，包括無稅（搵兼職拍賣官賣地）、尊重本地人文化（冇差佬去除中國人惡習）、自由港（連大英敵人都可在港買賣，佢哋就不但不攻，仲會有誘因保香港）。天才。
香港地運理應上世紀40年代隨大英沒落而完結，不過，先有中共未坐穩，跟住第三次走運。係乜？就係韓戰。
冇錯，各位黃之鋒們、曾德成們，香港最不方便嘅真相，就係由韓戰後，係中共最高領導叫大英唔好走。一國兩制，甚至係因中共最高領導覺得英國遲早會有左膠（麥理浩？肥彭？）搞爛香港「域多利價值觀」，所以諗出來。
大家今時今日感到嘅不安，就係因香港由中央最高領導最重要嘅項目，變成小豆。疏忽保護下，令「域多利價值觀」被不斷殲滅，大英帝國邊疆失守。
除非我哋出到卡斯特羅、李光耀，就算700萬人齊心，都不能對抗香港地運近耗盡嘅事實。仲要左膠、大陸人、傳媒、中聯辦、AO等人人有份齊殲滅。香港將成中國的波多黎各。所以各位，賺夠就好走喇。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
