智取大市：港股爆冷變大升市？
年初估定之後一年嘅港股走勢，通常好難預測得準，就以今年初為例，小弟當時預測全年港股會難玩，但4月港股進入大時代，造就賺大錢良機，雖然6月開始由盛轉衰，但始終都有過好景，所以小弟嘅預測最多只係啱咗一半。至於明年走勢，綜合身邊戰友嘅意見，大概可分為三類，睇
淡、上落市同埋唔識睇。
要答中港股一年走勢，其實等於跳水難度分4.0嘅項目，即使問神級投資者，估錯機會依然極大。所以，晉佳掉番轉，嘗試假設較多人估錯，然後勾劃出兩個冷門結果，再構建呢兩個冷門嘅劇本如何發生。所以以下內容只供參考，方便具想像力嘅投資者進行明年部署（包括小弟）。
不排除標指破頂
冷門賽果一（blue-sky scenario），港股大上大落，明年底前上試28000點，甚至破今年頂。能夠出現呢個賽果，條件包括美股破頂、內地經濟回穩及中共內鬥平息。
晉佳之前一直睇淡美股，寫足幾個月，皆因企業估值高、盈利增長減慢，睇圖表，標普500指數圓頂亦做足一年，似係長線利淡訊號，以TBB神劇對白形容，係人證物證俱在。之但係，美股喺高位畀咁多時間大家派貨離場，沽完貨又有低位畀你買返咁頂癮？諗真啲亦有其弔詭之處。另一方面，美股今年升勢集中於少數板塊，唔少板塊出現調整，會唔會接近調整完成？如果假設美國經濟增長引擎未止，標指再破頂，就會有大把持貨不足嘅投資者焗追貨。即使小弟睇淡美股，亦不能完全排除呢個可能性。
至於中央內鬥，所謂習派、江派明爭暗鬥，暫時睇落係局勢正在惡化，但後來各門各派見到A股係咁跌，損害各方利益，都唔係辦法，於是去到某個位就收一收手，令局勢突然間明朗化，股照炒、舞照跳，不再花精力處理內鬥，重新著重刺激經濟及轉型，再度燃燒起投資者嘅信心……之後不用多說了。
冷門賽果二（worst case scenario），港股恐慌性拋售，正確啲講係毀滅性拋售，唔估底。
條件好簡單，內地經濟泡沫爆破，美股見頂急插，然後出現經濟大蕭條……坊間太多呢類分析，唔信就上高登睇嚇文獻，恕不重覆。
如果要喺兩個冷門賽果之中揀，晉佳會偏向揀賽果一，原因係「人類係解決問題嘅動物」以及國家領導人或許比一般人聰明，或能早一步想出解決方法，你諗唔到辦法，唔代表佢諗唔到。
唔好講到一年後咁遠，講番正經嘅分析，恒指連續九星期受制20周線，今個星期踏入第10周，噚日再受制20周線掉頭下跌，似乎未見曙光，可能連帶明年初繼續向下。呢一刻，除非閣下近期買細價股有能力贏錢，否則都係觀望較穩陣，恒指破20周線再諗買貨。
新一年將至，最後送四個字畀大家──「見步行步」。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
來源 source: http://hk.apple.nextmedia.com
