股場放大鏡：鳳凰醫療有啟示
■鳳凰醫療寧願硬食3,000萬元人民幣融資收費，即公司認為人民幣貶值幅度不會少。 資料圖片
於2013年上市時係威係勢，由掛牌日起步位8.5元炒至倍升見17元的鳳凰醫療（1515），近期頻頻受到利淡消息困擾，最新一單是上周五收市後發出公告，稱由於外滙市
場波動，終止與由德意志銀行帶領授予該公司之美元銀團融資，該融資從未獲提取。
蝕3,000萬終止融資
鳳凰醫療同時發盈警，預期終止融資將產生一次性非經常性費用約3,000萬元人民幣，去年度純利因而受到較大負面影響。由於人民幣貶值預期逐步擴大，有人睇年底見7算，更淡者睇7.5，如果呢個時間仍堅持借美元債，即賺埋人民幣都唔夠蝕滙水，而既然鳳凰醫療寧願硬食3,000萬元人民幣融資收費，即公司評估過，人民幣貶值幅度不會少。
通告冇講銀團貸款金額多少，但以公司市值49.8億銀估計，大約幾億銀應差不了多少，即是說，成單交易取消是管理層評估過人民幣貶值可能接近或超過一成，才會止蝕3,000萬元人民幣融資費，呢個評估，對大家評價人民幣前景有很大啟示。
鳳凰醫療去年10月公佈，主要股東徐氏家族擬按每股配售價13.05元，向獨立第三方配售最多6,850萬股配售股份，涉資8.93億元，配售股份佔現已發行股本8.22%，交易完成後，徐氏家族持股由33.27%減至約25.05%。配股日已跌穿配股價，昨跌至5.98元，接貨者蝕逾50%。所以幾時都話，大股東就知悉公司價值，遇上主要股東突然大手減持，唔係好事。
歐陽風
本欄逢周一、四刊出
歐陽風
股場放大鏡 - 歐陽風 舊文
來源 source: http://hk.apple.nextmedia.com
