財經評論：膠蟹重現江湖
■近年收到的利是，「膠蟹」已近乎絕跡，最少都有廿蚊一封。 資料圖片
年關將至，過去一年無論樓市、股市都大起大落，去年年頭賺到的，隨時在下半年已倒輸。但一到過年，好多已婚人士都要派利是，如今經濟轉差，利是又會否大縮水呢？猴年的派利是金額，隨時成為今年樓市指標。每年農曆新年
，全港各大地產代理都興搞新春團拜，過去數年樓市好景，利是幾乎全部都是綠色及紅色（即50或100元），個別極高層更會派200元，足見豪氣。不過近三個多月以來樓市急轉向，一向成交量靜如死水的二手未見有起色，一手新盤更加賣唔鬱，不難想像代理都要為自己飯碗著想，留多個錢傍身。
利是銀碼成指標
筆者還記得在2008年金融海嘯後，樓市跌足半年有多，所以2009年牛年收到不少代理的「膠蟹」（即10元）利是。在近年，「膠蟹」已近乎絕跡，最少都有廿蚊一封。今年「膠蟹」會否重現江湖，似乎已不難估計。
新春期間派利是都是取個好意頭，據一名資深物業投資者講，好難以派利是金額多少去釐定經濟狀況，因為就算經濟好差，利是都不會突然之間縮水。以他為例，一封利是由100至500元不等，每年都預6位數字去派利是，經歷過沙士、金融海嘯、樓市大旺都不變。
他說家人的利是金額是不變的，如果是外人，年年向其他人都派開封封見紅至少100元，今年突然派少啲，即係人哋知你今年係咪好唔掂﹖所以如果就算經濟差、收入減少，利是錢講意頭都是不能夠縮，寧願在其他開支上減少，起碼保持年年都派相同銀碼。不過，亦有個別投資者表明，雖然利是金額不變，但就打算外遊避年，盡量只向家人或熟人派利是。
對於有錢的投資者來說，派利是著重意頭，寧願搵機會派少一、兩封利是，都要維持利是的「質量」。對於一班遇著寒冬的地產代理來說，今年派利是的銀碼絕對會成為後市指標。
記者：程俊華
財經評論 舊文
來源 source: http://hk.apple.nextmedia.com
