炒重組唔好計死數
2016年01月28日
歐美股市反彈，但內地就靠國家隊疑似維持秩序，先頂住昨日的急跌，港股跟隨反彈。要留意係一月將盡，跟住好快過年，故此二月份市況仲可能好波動。
個市反彈，但半新股就成為升市陷阱，好多出現洗倉式下跌。中國宇天(8230) 大跌32%，造0.51
元；新福港(1447) 挫7%，造1.08元；年年卡(3773) 瀉7.4%，造1.5元；巨匠(1459) 挫8.6%，造5.67元，呢批半新股，有部份大幅炒高再下插。這些公司沒有往績，市值又不大，部份可能上市都無法招徠，於是圍起貨大炒一輪，喺超高股價下，股價就算大插都唔係咁吸引，加上半新股想啤殼都唔似以前咁容易，所以真係唔建議投資者沾手。
國家隊疑似出手
雖然外圍市反彈，但A股昨早跌幅擴大，滬指一度跌逾4%，逼近2600點，隨後強勢「V形」反彈，滬指一度倒升，由於下午2時左右，兩桶油抽升，中國石化拉漲逾2%和中國石油拉漲逾4%，加上銀行股急升近1%，市場猜測國家隊可能於午後出手護盤。最後，上證指數收市報2735點，跌14點，惟開年以來累計跌幅超過24%。深成指數收報9422點，跌61點。
證券時報網透露，國家隊一直是大家關注嘅重點。去年自6月股災大手筆買入後，市面上沒有發現國家隊直接出手購貨的痕跡。但在近期披露的上市公司公告中，股市行情走弱之時，社保基金依舊積極參與上市公司增持，不到三個月介入資金已逾23億元人民幣。
至於港股都受消息牽引，大市高開351點報19211點，跟住內地公佈去年12月工業企業實現利潤跌幅比預期大，A股掉頭大跌，港股升幅大縮至71點。直至疑似國家隊資金入市掃A股，滬深兩市收復大部份失地，恒指收市報19052點，漲191點；國指收報7959點，升64點，成交762億元。
近排本港地產股大股東紛紛出來增持。長期做自己公司擁躉的恒地(012) 大股東四叔李兆基，就引起咗大行注意。花旗發表報告，話留意到截至今年1月20日持有恒地72.28%股權，認為現時市況波動下，不排除恒地將被私有化或重組。喺憧憬重組下，恒地股價揚5.5%，造40.05元
美銀報告指，四叔2012年開始增持恒地，當時持股量僅61.6%，按至2016年1月止，「四叔」合共斥資135億元增持股份，平均價45.4元，比現股價低16%，持股達72.28%。該行認為，由於現價比平均買入價平，李氏或會提出私有化恒地。
要抱平價等買包心態
該行估計，若恒地實物分派煤氣(003) ，估計恒地股東可獲1.45股煤氣及1手純地產業務的「新」恒地股份，再按資產淨值折讓50%計算後，推算理論價值達30.8元，連同價值19.3元的煤氣股份，合共相當於每股現時恒地50元股份，比現價有近三成溢價。花旗仲估計，恒地可能會加快更改農地計劃，維持該股為地產股中首選，睇61元，評級為「買入」。
對於花旗呢個估計，陸羽仁覺得好合邏輯，但唔好忘記，數係死嘅，大股東係生嘅，佢哋算盤肯定密過分析員。四叔係咁增持，好處係俾咗信心保證俾大家，唔好處係有個大買家喺度，個價跌得唔夠。家四叔仲未買夠七成半股權，仲有增持空間，尤其個市唔好，大股東仲有時間慢慢等，如果小股民高位衝入去買貴咗，捱價過程都好考驗意志，所以就算信個報告，最好都係抱住平價等買包心態，見有大飽價先買來擺，咁就穩陣啦。
陸羽仁
金融High Tea 舊文
來源 source: http://hdfin.stheadline.com
