一周三件 - 錢雋 2016年1月4日
一周三件：新創建等爆升
■新創建買入商務飛機租賃Goshawk四成權益，增值潛力強。圖為集團主席鄭家純。 資料圖片
新創建（659）近半溢利都係嚟自熱爆嘅水務同物流港口瓣數。就算唔計呢兩瓣有潛在分拆嘅肥仔增值效應，集團明年預估PB，比10年平均值，平咗近45%，加埋5厘高息。博悶股瞓醒，有得諗。
兩業務具潛力
新創建上年度嚟自水務同物流港口兩瓣溢利，分別去到3.8億元同7.9億元，兩瓣加埋應佔集團總溢利26億元、44%比重，唔係細數。
而呢兩瓣，一個hit中市場熱爆，場內閒閒地十幾廿倍PE嘅水資源；一個又食住重中之中嘅一帶一路國策，係本地大孖沙綜合企業當中少有。又喺項目一定嘅盈利基礎下，若果透過資本市場反映身價，應該已經可以為新創建帶嚟唔錯增值。
仲未止，新創建上年度出售澳門電力權益變現，加碼水資源相關瓣數。又喺6月，同重慶市水務資產簽署協議，打造一個高達300億元人仔嘅平台，投資環保相關瓣數。而上年2月，新創建以約17.5億港元，買入商務飛機租賃Goshawk40%權益。隨住呢兩瓣再俾新創建湊大啲，第時嘅增值潛力，仲肥仔！
唔扯咁遠，新創建家陣0.96倍PB，場內專業預估集團明年0.81倍PB，比起10年以嚟平均1.47倍PB，平咗45%！又好保守咁計，新創建今年盈利，只係keep到上年水位，斷估集團今年亦可以keep番上年派息，現價11.6元，講緊近5.2厘息，防風力好勁。
煲新創建，當翻半番到17.4元，明年預估PB，先上到去1.2倍，都仲未去到上邊10年平均值。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com
