老牛
2016/01/04 09:03:34
網誌分類: 經濟
美股去年最後一個交易日都要跌市收場，杜指跌178點至17425點，全年累計跌2.2%，係金嘯海嘯以來首次見紅的一年。標普500指數跌19點，收報2044點，全年下跌0.7%，只有以科技及生化股為主的納指有進賬，全年升5.7%。美
股自金融海嘯以來，經歷了七年牛市，去年可以講係最無「牛氣」的一年，呢隻老牛即使未死，都廢廢地啦。
不過，唔少分析認為，美標普500指數只係跌0.7%，好叫人驚訝。不是驚訝美股點解唔升，而係點解唔跌，富國銀行基金管理的首席股票策略師John Manley就表示，2015年全球市場其實經歷了很多會令股市大跌的不利因素，例如油價大幅急滑，美元大升，商品市場大冧，聯儲局加息預期高漲，最終於12月決定加息；外圍方面有中國股市狂升急瀉，中國經濟放緩，可能出現「硬著陸」，歐洲方面又出現希臘債務危機，佢認為美股全年只係較去年輕微收低，可見美股非常硬淨。
事實上，除了歐洲股市以外，去年的主要投資市場，包括亞洲股市、金市、債市都唔得。中國上證綜指收3572點，全年仍有10.5%進賬，不過，相比6月時的高位5178點，下半年跌見咗31%，表現其實慘不堪言，而港股恆指全年大跌7%，其中國企指數更勁插19.4%！亞洲股市整體而言，即使有中國股市幫補一下，去年表現仍然好弱，MSCI亞太指數全年下跌4.3%，而且係連續第二年下跌。亞洲股市之所以咁弱，主要係受到中國經濟增長放緩以及大宗商品下跌等因素的拖累。
瑞銀駐新加坡首席投資官Kelvin Tay表示，2015年是尤其動盪、艱難的一年，大宗商品市場的劇烈拋售嚴重影響了亞洲匯市、尤其是東南亞貨幣和股票。有統計指出，去年最重創的大宗商品莫過於原油，紐約油價由上年底的每桶60.16美元跌至去年底的37.07美元，全年大插超38.4%。其次便是工業用金屬，其中工業用貴金屬鉑金（platinum）價格跌了26%；銅價跌了24%；鋁價跌了11%，鎳（nickel）價更勁跌42%！油價方面，市場估計，由於伊朗石油將於今年初出籠，而沙特鐵定唔打死美國頁岩氣生產商，誓不減產，所以石油供應在上半年只會有增無減，油價仍會向下，下半年就要睇睇沙特覺得挾夠頁岩氣生產商未，覺得挾夠的話，沙特開始減產，油價始會反彈。至於工業用金屬，分析估計價格今年下半年會穩定下來，但離底部仍有一段相當的距離。除非中國經濟快速好轉，需求增加，否則仍會繼續無運行。
咁多個市場之中，去年表現最好的成熟市場要算歐洲股市啦，歐股雖然距離市場此前預計大升14%差好多，但最後仍有6.8%進賬，已經係十年以來最好。當中德國、法國和義大利股市均實現了8%的漲幅。由於歐股預期市盈率為16倍，而標普500指數目前市盈率為22.5倍，歐股估值仍然相對便宜，所以預計歐股今年會繼續跑贏美股。
其實睇環球股市，好多在去年4月期間見咗高位，美股兩大指樓更在4、5、7月在高位橫行，出現一個高位平頭的型態，上穿高位好無力，令人懷疑這個7年牛市高位已見，今年將不能突破高位，可能反覆回落，要留意住老牛會否變成小熊。不過以美股近年那種慢上型態，回落也可能是慢落，不過若然外圍的牛市真係玩完咗，港股就更加難炒，因為大陸經濟未掂，睇唔到外資金好有興趣來港炒大陸股。
陸羽仁
回應(3) 我想回應
陸羽仁 BLOG 舊文
來源 source: http://blogcity.me
