中環在線：
猴年紅盤大跌市無礙心情
李小加肉緊玩細路
■被李小加雙手搓臉嘅小朋友（右）好似唔多like，但周松崗（左）就睇到笑曬。 何頴賢攝
恒指喺猴年首個交易日，一開波就跌800點，搞到股民個個都年初四咁樣，不過港交所（388）行政總裁李小加依然生猛，以最樂觀嘅態度主持開市儀式。
佢第二年邀請小學生去到交易所打鼓助興，對住班小朋友十分肉緊，又搣又攬，場面惹笑，為大跌市增添喜感。
港交所主席周松崗、證監會主席唐家成同財經事務及庫務局局長陳家強噚日齊集交易所主持開市儀式，三位都戴紅色領帶，襯曬新年氣氛，可惜幫唔到個市，唔通同李小加打咗條紫藍色領帶有關？
不過呢個開市儀市的確好有氣氛就真嘅，事關港交所第二年請來英華小學鼓隊「鼓樂英騰」嘅成員去打鼓助威，呢班小朋友獲獎無數，又成日去海外交流，經驗豐富，個個都好精靈醒目。
去到頒紀念品環節，李小加同成隊人High five，其間有小朋友用普通話同李小加講：「明年再來！」𠱁得李小加好開心。影相時，佢仲要七情上面、好肉緊咁整鬼前排嘅小朋友，不過呢位哥哥仔就好似唔多like。
■陳家強（左）同唐家成（右）都戴咗紅色領帶出席開市。 
■英華小學鼓隊噚日喺交易大堂打鼓助威。 出市代表最多收千元利是
旁邊嘅周松崗都好肉緊㗎。佢拜年時，除咗祝願大家猴年順境，希望各位好似馬騮咁靈活、善於應變之外，仲叫大家「加多幾錢肉緊，保守一啲，穩陣一啲，小心一啲，小心駛得萬年船」。李小加都認為，今年「東南西北中的好消息很少」，考驗市場智慧與耐心咁話。
開市儀式嘅重要環節當然係派利是喇，港交所準備咗廿封500蚊與十封1,000蚊利是，派畀出市代表，傳媒就位位50蚊，冇縮水。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
