油企累銀行
2016年02月12日
港股猴年大插！美股低收，但推低港股最大力嘅唔係美股，而係日股。內地新年休市，日本成為區內最主要市場，咁啱喺過年前日本央行出招推出負利率，日圓成為避險貨幣，在匯價大升不利經濟呢個分析下，日經指數跌到七個一皮，連番急挫。港股自然無運行，收
市急挫742點，再創三年幾新低。
日圓升搞散日股
港股同日股過去關係唔算太密，現在跟住東京股市碌低，一來係因為A股無市，二來係炒家將日圓匯價同日股掛鈎，話圓匯升不利經濟，砌低日股。按照同樣邏輯，人民幣有貶值壓力，港元同樣受壓，本來匯價跌利好經濟，但一樣可以作為大戶來港撳機提款的理由。只能講一句，當股市進入下行跌浪，任何理由都可以成為睇淡原因。
正如話睇唔過眼拉小販，都可以搞出一場暴亂，內憂外患下，恒指收報18545點，大跌742點，跌幅3.9%，國指跌幅都仲多，收報7657點，挫396點或4.9%，大市成交669億元。藍籌股普遍下跌，連強勢的騰訊(700) 都跌逾半成。
環球股市呢輪下滑，唔係由內地股市同經濟作為理由，而係由銀行股帶頭。日本銀行股大跌，解釋係負利率影響盈利，令大型銀行被大拋售，但下滑的銀行股唔止係日本，歐洲同美國銀行呢排都好唔掂。大戶沽低銀行股，主要係擔心油價不斷尋底，令相關企業不斷惡化，最後會賴債。
在商品跌價潮中，其實唔止油價爆破，其他鋼鐵等商品一樣唔靚仔，貸款畀油企同礦企的金融機構，呆壞帳風險大增。美國早前已吹起一陣油企債務違約的暗湧，由於油價仲未有起色，市場憂慮吹向銀行，觸動股市神經。本港銀行業過去好少會沾手礦務同能源業，商品跌價產生的憂慮，主要反映喺跨國銀行之上，對礦企貸款較勇的渣打(2888) 急挫7.4%，再創上市新低。渣打股價早已碌完再碌，管理層見形勢急劇惡化，大刀開源節流，既狂削高層，同時向股東抽水。若然渣打無向股東集資，喺呢輪惡浪就真係唔知點捱。雖然佢已經向股東成功伸手，多咗幾個錢傍身，但如果情況唔好轉，擔心財政壓力仲會不斷增加。
大摩唱匯控或見38元
匯控(005) 情況看來比渣打為佳，但係大浪冚過來，就算畀浪尾掃一掃，都已經拋到人唇青臉白。大摩發表報告，話油價未見起色，加上收入增長疲弱，將大笨象評級降至減持，仲話最差情況下股價可見38元。
另一大行里昂同樣狂踩銀行股，不過就覺得佢仲好過渣打少少啦。匯控早排股價插落50幾元的多年低位，息率去到7厘，數字已經好吸引。不過，自從管理層開完會，話要全球凍薪，令人意識到銀行形勢仍然十分吃緊，股價再呈壓力。現今市場關注能源相關貸款的憂慮浮現，匯控喺猴年插穿50元大關，收報49.5元，跌幅超過半成，歷史息率去到7.8厘，如果維持呢個派息，買佢乜都唔使做就可以跑得快過通脹好多，不過，市場係最聰明嘅，由呢個回報顯示，市場覺得銀行股風險正不斷急升，所以買得呢類股就要綁緊安全帶，如果唔係不如等市況穩定至郁手。兵荒馬亂下，就算買其他本地銀行股都要諗清楚。
在油價衝擊逐步浮現下，其他同能源相關的企業，同樣都承受風險溢價急升的壓力，所以無論係想買股博反彈抑或長揸，都要留意呢個因素。喺金融風險增加下，個別地產股逆市上升，相信係因為市場見到形勢混亂，聯儲局有可能押後加息，於是炒炒低負債地產股好似信置(083) ，但如果跌市持續，相信無邊類股份可以避過，如果早排低位入貨博反彈，家都可以考慮出貨食吓胡啦。
陸羽仁
金融High Tea 舊文
來源 source: http://hdfin.stheadline.com
