中環在線：年齡相距24年 生肖皆屬馬
CY索羅斯同月同日生
■索羅斯（右）同梁振英都係生肖屬馬，都唔係咁受港人歡迎喎。
提起最近人氣高企嘅國際大鱷索羅斯與本港特首梁振英，兩人好似風馬牛不相及，不過唔講唔知，佢哋係有共通點嘅，咁啱得咁蹺，佢哋同樣生肖屬馬，仲要都係8月12日生日，可以約
埋一齊慶生；如果要再數多樣共通點，應該係兩人都唔係好受香港人歡迎囉。
成日話退休嘅索羅斯呢期爆紅，佢早前預料中國經濟將會硬著陸，又話已經沽空亞洲貨幣，隨即引來官媒連日刊登多篇文章反擊，可見阿爺幾咁重視佢嘅一言一行。華華八卦想知道佢今年運程，發現佢1930年8月12日出生，咁啱，梁振英就係1954年8月12日生日，索羅斯係大過梁振英24年嘅馬仔，兩人都係獅子座。
料梁振英今年意外多
獅子座嘅人出名愛面子、出風頭，又鍾意指揮別人，好容易剛愎自用，具有野心，個性比較專橫，索羅斯與梁振英有冇以上特質，各位自行判斷嘞。
咁兩位猴年運程如何？雖然佢哋都係屬馬，但唔同年份嘅馬，運程係有別嘅。根據李丞責嘅猴年運程書，1930年出生嘅馬人，即係包括索羅斯，「這是上天向自己爭奪命運的一年」，如果敢向別人求助，收入容易比預期多，而且事業與財運多貴人幫忙。
OMG，唔通索羅斯今年真係可以喺股滙市場大有斬獲？猶記得索羅斯掀起97/98年亞洲金融風暴，香港人唔見好多錢，巧驚驚呀！
至於1954年出生嘅馬仔，包括梁振英，李師傅就估，呢年出生嘅馬人，今年將會意外多多，健康壓力好大。哎呀，咁梁生要多多保重先得喇，否則大鱷真係殺到來，冇人去頂唔得㗎喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
