笑到最後：一注獨贏沽恒指
還記得2月之初，好似要動刀動槍，索羅斯要沽爆亞洲，油價又尋底下跌，中國經濟似將硬著陸。傳統智慧再一次發揮功效，就係當以上不利消息通街唱之時，亦都距離見底不遠，2月下半月又真係反彈得唔錯，至上個星期五都仲屈得返上到19000點樓上，身邊炒股之友都覺得炒股手感又
返嚟，似乎歌舞昇平之日已來臨。
但係世界上並冇咁著數嘅事發生，更何況你處身於中港股市。一般金融教科書會教你，業績向好，股價應會上升，例如，美國蘋果早幾年賣iPhone賣得好，股價一路上升；近年陷入疲態就跌。可惜，中國「國情」有別，任何好消息，都只會係中國內幕人等沽貨好時機，加上中國人急功近利，冇人打算長線投資，只想短線獲利，騰訊（700）呢類長升長有股只係中國異類，其他中資股當業績好獲追捧，升到咁上下寧願玩財技炒埋一份。
真正中國「國情」，並唔係五千年文化孔孟仁義禮智，而係：一、有好嘢一定唔會益你；二、賺夠就移民。
基於以上「國情」，今年3月3日開始嘅兩會（全國人大於3月5日召開；全國政協於3月3日召開），又係沽貨時機，其實直頭一注獨沽恒指。
每年兩會之前一定會有一輪憧憬，今年可能因為外圍影響太大，加上A股股災後中國支笛已冇乜人聽，所以唔覺有憧憬。但客觀事實係，2月中至今恒指由18279點反彈超過1,000點，按照呢篇文第一段「講出嚟已經反映曬」嘅傳統智慧，到有投資提兩會有憧憬時，已經反映曬。2月中後嘅升幅可能係預支兩會憧憬。
過去5年兩會開會後，股市都係例跌（見表），其中對上兩年係跌得特別急，幾乎一開會就跌。經歷A股股災，以及之後種種政策失誤，甚至李波失蹤案，你覺得中國人會想入資多啲，定走資多啲？現時官方喉舌吹捧兩會會講「供給側改革」。直譯自美國列根年代supply-side economics，美國正版，簡而言之係減稅；中國嘅A貨係「去產能、去庫存、去槓桿、降成本、補短板」，太難明、太複雜，唔似一個成功政策。
如果兩會冇好消息，當然跌係無可避免，因為政府繼續無力阻止中國經濟下滑；就算有好消息，你信佢執行得到？或者，直接好消息出貨就算，連問都唔使問。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
