中環在線：
盆菜宴婆婆好冧郭基煇
■郭基煇（低頭者）噚日主持長者盆菜宴很受歡迎，連婆婆都拉住佢咬耳仔。 李潤芳攝
■馬灣舉行的長者盆菜宴筵開70席，宴請超過800名長者參加，十分熱鬧。 李潤芳攝 新鴻基地產（016）第6年喺旗下馬灣挪
亞方舟舉行長者盆菜宴，大股東郭炳江兒子郭基煇（Adam）連續第2年主持大局，33歲嘅佢青靚白淨，又係高富帥，唔只吸引到後生女，就連公公婆婆都好鍾意佢，有婆婆就拉住佢咬耳仔㖭呀。
新地一連兩個星期日舉行盆菜宴，噚日首先筵開70圍，宴請超過800名嚟自灣仔嘅老友記，下星期日就到沙田區嘅長者。
福袋有保溫壺
Adam配合番賀新禧嘅主題，一身棗紅色唐裝，中午前準時現身，跟主禮嘉賓勞工及福利局長張建宗簡單喺台上講幾句之後，就落台向公公婆婆派福袋，旋即引起一班老人家起哄，唔知道佢同班老友記傾乜咁高興，總之現場氣氛相當熱鬧，唔少老友記捉住佢傾偈，甚至咬耳仔，斷估佢哋唔係討論香港樓市前景啩。
由於福袋太搶手，華華冇法攞到一個嚟睇睇，但據聞，入面有米、粟米油、通心粉、頸巾、保溫壺等，相當適合長者使用。而呢次盆菜宴嘅盆菜，就係由挪亞方舟度假酒店專登因應番長者口味與健康而做嘅。
張建宗搞爛gag
同場嘅張建宗亦十分鬼馬，佢除咗叫一班長者做哥哥姐姐外，仲大搞爛gag，話家陣港人壽命平均有80幾歲，10年後更加會有4萬幾名人瑞，「長者」係時候重新定義，冇80歲都唔可以叫做長者。
佢認為，在場嘅哥哥姐姐只算係「高青」，就好似電視嘅「高清」咁喎，𠱁得在場老人家不知幾咁開心。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
