馬騮市 愛上落
2016年02月16日
馬騮生性好動，野外生活成日係樹上跳上跳落。今個猴年，股市初步都係好似馬騮仔，跳上跳落，春節後復市，兩個交易日跌咗1000點，昨日反彈番接近600點。股市升得高就會跌，跌得多就會彈，但升升跌跌，就玩殘好多股民。
阿爺睇場 A股開市維穩
內
地無市期間，港股俾人狂插，昨日A股開市，原先好多人預期佢要補跌，但係開市時，人行行長周小川先出口術，話明唔會俾投機沽空者主導市場。阿爺講明會睇實炒家舉動，昨日A股開市雖然一度下插，但好快轉穩，A股大幅低開約3%後曾反覆回升，滬指收復五日均線，但受制資源股低迷，上證綜指收報2746點，跌17點；深成指報9668點，跌4點，兩市成交只有3290億元人民幣，跌幅算係溫和。
內地股市跌得比預期少，除咗話阿爺緊密關注，A股跌穿三千點關口後，下跌空間逐步減少，相信係令沽空造淡者不敢瘋狂進襲的原因。睇番呢排下跌嘅資產，無論係原油、股票，都係一浸浸落，跌完之後又彈，彈完之後再跌，測試低位支持。資產價格唔係一插急跌，而係跌跌彈彈，好大原因係佢哋已經跌咗唔少，唔會有好多人揸盡好倉，相反，見高沽貨造淡者多咗，加上各國政府開始關注資產跌價潮，所以大戶都唔敢一口氣插到底，寧願沽吓買吓逐浸食，但唔好睇少呢種反覆尋底嘅跌法，因為咁樣慢慢消耗購買力，消磨投資者意志，殺傷力都可以好大。以後市看，困擾市場的美息、油價、中國因素未消除，急跌之後的急彈，似係反彈，未係見底。當然反彈可以彈多幾日，但就好難睇得太樂觀。
北水掃貨 力買匯控
港股昨日話題之一係匯控(005) 。呢排匯控有兩個重要消息，一個係開完管理層會議後，傳出一刀切凍薪消息；二係總部會否遷離倫敦。匯控正式公佈，未來幾年會將總部繼續保留係倫敦。呢個結果其實係市場預期之內。匯控放出消息要搬竇，好大動機係想同英國政府就稅務講數，後來英國政府已作出回應，加上去年A股暴跌同最近人民幣貶值，大氣候不利匯控將總部搬番香港。
另外匯控高層開會決定凍薪嘅決定，宣佈後惹起員工好大反彈，管理層收回成命。有銀行界人士話，呢個決定本來係高層閂埋門傾，點知爆咗出街，以匯控全球咁多地方有經營，有些地方又有工會，一搞就被打殘，於是暫時轉軚，但全球銀行業喺去槓桿化下，經營壓力有增無減，管理層好難開源，如果唔想辦法節流，好快就會俾基金股東炒魷，故此收回成命，估計只是權宜之計，未來除非經濟突然好轉，否則點樣慳錢，仍然會係管理層日思夜想的工作目標。
東亞派息減得多
有中環茶友傳來滬港通數據，睇到好多南來買匯控的買盤，最合理的解釋係呢排好多內地大媽買匯控，變相轉走人民幣資產，作為分散風險的投資。雖然茶友懷疑會唔會有人顛到想敵意收購匯控，所以密密儲貨，但佢自己都話匯控成萬億市值，唔係咁易買起。我就話敵意去收購萬科(2202) 都做得出，雖然轉去搞匯控就誇啲，但如匯控深跌到30幾元時，都唔好話無可能喎。
匯控宣佈總部續留倫敦，撞正市況反彈，股價重返50元大關，全日升4.5%。恒指亦一度飆618點，高見18937點，收市前略回順，收報18918，飆升598點或3.3%，成交金額664億元，唔算好多。
收市後，東亞銀行(023) 率先公佈去年全年業績，盈利下跌17%至55億元，較市場中位數預測下跌13.5%遜色。每股基本盈利1.95元，同時減派息26%至每股0.5元，派息減幅比盈利跌幅明顯。主席兼行政總裁李國寶表示，由於內地經濟放緩，以致業績未如理想，展望今年，經營環境不會明顯好轉，未來成本控制繼續成為首要任務。
陸羽仁
金融High Tea 舊文
來源 source: http://hdfin.stheadline.com
