金融High Tea 2016年2月25日
減辣有路捉
2016年02月25日
財政司司長曾俊華發表《財政預算案》，焦點除咗派糖外，仲有當然係會唔會撤辣招。雖然喺預算案公佈前，有地產界提出要減辣，結果係預算案提都唔提。本地樓價喺去年第四季開始下調，但調整幅度來得好快，家樓價回落形成共識，只係未去到政府覺得要救市的水平。
等跌到夠先鬆按揭
樓價回軟，地產界要求減辣，但取態各有不同。地產發展商就最想減辣，因為如果樓價續跌，咁地產商就要減價賣樓。雖然早前地價已經因為樓市回軟下調，但地產商高價競投的土地，好多都仲未賣，當然唔想樓價急跌。
至於地產代理都想減辣，因為一旦減辣，市民對樓市預期改變，可能又有一班準買家會飛身上車，即時佢哋就可以做到生意。不過，如果政府唔減辣，佢哋都可以變招鋤價，幫買家壓價，所以預算案公佈無減辣後，有代理就提出，不如放寬按揭啦！代理大佬認為，當局可因應樓價回調，考慮放寬按揭成數，讓更多置業者可上車，紓緩目前樓市一潭死水的現象。
至於銀行同代理心態有相似，就係減唔減辣唔係最重要，最重要有交投，多的成交。對銀行嚟講，今年生意唔易做，按揭係最大把握的業務之一，正因為咁所以爭得最緊要，如果金管局可以放寬成數，等如成個按揭市場個餅大啲，咁對銀行來說相差好大。
按照家政府的「攤路」，如果上車盤唔每個跌番100萬，都幾難減辣，如果當上車盤係500萬計，即係樓價要跌兩成；如果用400萬計，咁仲要跌夠兩作半。正常來說，最大可能係樓價回軟到咁上下，金管局會鬆手，容許上車盤同首次置業盤增加按揭成數，慢慢去番70%水平，放寬完上車盤按揭成數，先至諗取消辣招稅等下一步行動。照咁睇，想政府取消辣招稅，仲要有排等。新地(016) 昨日跌1%，和大市同步，就知大家睇完預算案都無得點睇好樓市。
至於預算案中提及2016至2017年度將有29幅土地供應，可供興建1.9萬個單位，連同鐵路物業發展、市區重建局、私人重建和發展項目潛在合共可供興建2.9萬個單位，基本上都係預算之內。不過，家政府主力將土地起私樓，公營房屋慢慢又排起長龍，整體房屋供應緊張的問題，在幾年間相信都唔會咁易紓緩。
思捷轉虧 基金減持
預算案對大市影響溫和，港股主要係跟隨中美股市波動。隔夜油價再瀉，美股跌188點，港股低開後挫逾三百點，但內地股市反覆造好，令港股跌幅收窄，睇番內地個市，在兩會前同中證監換人消息後會穩定番啲，昨日升0.9%。恒指收報19192，跌222點；國企指數收報8061，下滑108點，成交金額607億元。
最近大公司宣佈業績都係麻麻。發盈警的康師傅(322) 股價再瀉6.4%，報7.49元，為包尾的藍籌股。匯控(005) 績後續降近1%，報48.7元，去年業績曳的渣打(2888) 收造44.75元，大跌6.3%。純利倒退超過六成的澳博(880) 仲慘，大跌近10%，收造5.05元。
成衣股思捷(330) 公佈截至去年底止中期業績盈轉虧，股東應佔虧損2.38億元，不派中期息，股價即插5%收報7.88元。公司披露在2月22日，遭基金Sanderson Asset Management減持749.8萬股，每股平均價8.06元，持股量由5.1%減至4.71%。
藍籌業績難有驚喜，輸少就當贏，由於個市彈咗咁多，可能會唞唞。美國利息同內地形勢暫時見唔到大壞，資金因此炒啲穩陣股，所以隻長江基建(1038) 又彈上一年新高。
陸羽仁
金融High Tea 舊文
來源 source: http://hdfin.stheadline.com
