中環在線：羅康瑞為愛女擋記者追問
「唔好糟質阿女」
■羅康瑞（右）同阿女羅寶瑜出席瑞房業績會，羅寶瑜表現淡定。 方楚恩攝
越來越多本地家族企業嘅富二、三代加入公司，兼且高調現身，好似瑞安房地產（272）太子女羅寶瑜（Stephanie），舊年中期業績會首度亮相後，噚日再主持業績會，
表現更加淡定，佢爸爸羅康瑞護女心切，傳媒問多兩句，佢已經幫口叫大家「唔好糟質佢」。
34歲羅寶瑜拒認接班
Stephanie半年前亮相齋坐，睇羅康瑞做示範，噚日就開金口，介紹番佢負責嘅收租業務。
佢擔任瑞房旗下中國新天地執董，大家八卦問佢做成點，慣唔慣，佢冇怨言亦冇嗌辛苦，反而係旁邊嘅羅康瑞見阿女俾一班傳媒圍住，就錫到出面，出口叫大家「唔好糟質佢，佢咪冇咁辛苦囉」，之後又加多句，話佢勸咗阿女好耐，佢噚日先肯出現咋。
34歲嘅Stephanie喺麻省衛斯理學院畢業，早於2012年加入瑞房。華華問羅康瑞係咪準備交棒，羅康瑞即時笑曬，好溫柔咁話「交畀寶瑜佢答係咪接班」。Stephanie就細細聲話「唔敢講」，仲以「主席」稱呼爸爸。
太子女亦好識做，借業績會賣口乖，讚身邊老臣子與新同事。佢提到，公司𠵱家要轉型，而且去到一個比較關鍵嘅時間，現有幾位老臣子，例如執董黃月良，太子女讚佢喺公司時間比較長，經驗好豐富，加埋今年1月新到任，接手做財務總裁嘅孫希灝，佢認為，呢個新嘅班底幫到公司轉型，提高營運能力同埋執行力。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
