中環在線：美財長晤財爺真笑容
與梁振英企得生硬
■傑克盧（左）早上與曾俊華會面時，笑容可親。 財爺fb
民建聯譚耀宗早前同財爺曾俊華講，「有啲人讚賞，背後係挑撥緊你同特首關係」，呢個可能係事實，但係財爺好多時真係唔讚唔得喎，淨係講形象討好，或者公關技巧，財爺都贏到開巷喇。
好似美國財
長傑克盧（Jacob Lew）首度訪港，噚日早上先同財爺與財經事務及庫務局局長陳家強喺政府總部見面大約半小時，中午再去禮賓府見梁振英半小時。
會後，財爺與梁振英都將合照公諸同好。財爺將3張合照放上自己facebook（fb），全部都係氣氛融洽，大家笑得相當燦爛又握曬手。
■傑克盧（左）在禮賓府與梁振英會面後合照，企得生硬。 政府新聞處 同財爺一早認識
反觀梁振英透過政府新聞處發稿，相中只見傑克盧與梁振英好似兩條柱咁，而且企得十分生硬。傑克盧鍾意邊個多啲，應該都唔使問阿貴喇啩。而事實上，佢同財爺早就認識，舊年10月財爺先至飛去美國同對方傾美元走勢。
大家可以話，政府新聞處發相當然要感覺官方些少，但係梁振英都有fb㗎喎。不過最衰都係fb，fb早前新增Angry公仔，搞到網民連日狂畀Angry梁振英（華華個fb亦因此連日俾梁振英洗版呀，陰功！），可能為免傑克盧無辜收到大量Angry，梁振英唔放佢哋嘅相上fb都係明智嘅。
講番傑克盧今次訪港，主要因為佢上星期去上海參加二十國集團（G20）財長與央行行長會議，就順便飛來香港，佢同財爺與梁振英都係禮節性會面，冇傾實質重要議題。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
