細粒內銀惹炒作
2016年03月02日
人行宣佈降準，港股反應初時比較溫和，升幅不大，但下午A股急彈，推高埋港股，降準唔算係好大力度的招數，個市有咁反應，已經算係咁啦。
港股對人行降準的消息，主要跟住內地走。滬深兩市小幅高開後走勢反覆，直至午後開市，滬指跳水後迅速回升，創業板更報復
性反彈，盤中急速拉升近百點。上證指數最終收報2733點，漲45點，升幅1.7%。深成指報9322點，漲224點，創業板指報19342點，漲54點。
水泥股炒兩會概念
港股隨着A股波動，內地股市一度回軟，港股都一度倒跌3點，低見19108點。A股下午兩時過後突然掉頭急升，港股又由跌轉升，尾市更飆逾300點，恒指收報19407點，急升295點；國企指數收報8068點，上揚151點，成交金額670億元。
雖然話市場對炒政策興趣無以前咁濃，但兩會在即，市場都憧憬阿爺會加大基建投資，水泥股受追捧。安徽海螺(914) 成升幅最大的國企指數成份股，收造16.58元，飆7.4%；中國建材(3323) 升6.4%，金隅(2009) 升7%。
最近內企對於買銀行，似乎興趣甚大。國壽宣佈用233億元人民幣，入市廣發行，係最顯眼的大手交易。另外，恒大地產(3333) 都有動作，在場內場外入股盛京銀行股份。
內地進行金融改革，放寬咗保險公司同銀行營運限制，不少醒目資金伺機而動，對國壽入股廣發行，大行摩根士丹利發表報告，認為增持廣發銀行至43.7%股權，該行相信有助國壽由純保險商變身至金融服務商，類似平保(2318) 營運模式。
大摩認為，增持雖然長遠有助提升國壽價值與協同效益，估計市場短期會關注收購帶來的資產負債表風險及潛在整合的挑戰，同時收購價近市帳率1倍，估值不平，因現時H股銀行市帳率只有0.6倍。
國壽今次係買入有控制性的股權，同喺市場上「散買」唔同，要俾溢價無可厚非，至於高低就見仁見智。不過，收購後整合同變身過程需要時間，故此短期對國壽股價刺激性唔大。
反而恒大披露入股盛京仲有趣。恒大直至2月29日，在市場收購共1009.05萬股盛京銀行(2066) H股，及在市場外通過大宗交易方式收購共3.14億股盛京銀行H股，合共3.24億股盛京銀行H股，佔盛京銀行已發行股本總額約5.59%，總代價為38.916億元。恒大解釋，因盛京銀行財務表現強勁，收購事項對該公司而言為一項合理的投資。
盛京逼近上市後高價
睇番盛京喺2014年上市，由於前後期上市的內銀股唔少，佢規模唔係咁易吸引到大基金捧場，股價大部份時間喺10元水平浮沉。停牌前一段時間，佢收由9元起步剷上12.6元，已經係掛牌後高位，好接近歷史新高。
現時公司披露的最主要股東為瀋陽產業投資，持有8.28%股份，其他四大股東持股都係5、6%，恒大入股後已經成為五大主要股東之一。
盛京銀行現時市盈率8倍，息率只有2.77厘，市值不足200億，係內銀屬於細細粒容易食類別，數字上佢比起其他內銀股唔係咁平，股民追捧多數係用投機角度考慮，期望以恒大狂風落葉式的交易作風同近日對大搞金融業的興趣，唔排除會有一番炒作。
陸羽仁
金融High Tea 舊文
來源 source: http://hdfin.stheadline.com
