操盤手劄記：男人的浪漫：買胸圍股
眨嚇眼就到咗3月最後一日，2016年過咗一季喇！喺中國帶領下，金融市場2016年開局好差，根據Eurekahedge統計，亞洲對沖基金頭兩個月跌5.6%，係有紀錄以來最差開局。睇分類，75%專注亞洲嘅對沖基金見紅，當中92%係追蹤大中華地區。中港
股市今個月算爭氣，全季埋單計無咁傷。A股昨升2.8%，重上3000關；港股亦升2.2%，重越20800。
今季有好多事發生，亦有好多事了結，傳媒行業尤其令人欷歔。壹傳媒（282）旗下雜誌《FACE》前日出版最後一期；東方報業（018）旗下《太陽報》今日最後一日出報。就連「亞視永恒」，明日之後都成絕響。
一盤生意搞到要執，問公司，一定係經濟問題；問政府，一定係土地問題，除非唔係。咁有乜生意無咁受經濟好壞、土地多寡影響呢？有，女人消費品！嚇，零售市道不景喎！係，有錢買貴啲，無錢買平啲囉！化妝品、衣履鞋襪、銀包手袋、珠寶首飾……女人一見到就會舂埋去，有用無用照買如儀，女人錢易賺是常識吧！
超盈跌至4.15元吸納
女人消費品範圍好大，由必需品到奢侈品都有，揀相關股份投資都幾費神。但有一類幾特別，就係被《每個小三背後都有個黃臉婆》一書形容為「那是一種必須的奢侈性消費品」嘅女士內衣。女士內衣涵蓋胸圍、內衣、內褲，當中以胸圍最多花臣，又分cup，又分功能，不一而足。
胸圍股有黛麗斯（333）、安莉芳（1388）、超盈（2111）、維珍妮（2199）、都市麗人（2298）等，當中安莉芳、超盈、都市麗人都係12月底年結，近日放榜，分別多賺7%、39%、27%，舊年咁差嘅環境都有盈利增長，而且隻隻有息派，正好印證女人係「市可跌，胸不可跌」！
胸圍股中，我嘅心水係超盈。該公司既與安莉芳、黛安芬、Spanx、Victoria"s Secret等知名內衣品牌合作，又將客戶基礎由內衣市場擴展至運動服裝物料市場，銷售彈性織物面料及彈性織帶作生產運動胸圍、單車服、跑步服、瑜伽服及便服之用，可望成為增長引擎。
據行業報告，全球女性內衣物料市場銷售收入今年將增至95億美元，超盈持續提升研發及設計能力，有望取更大市場份額。昨收4.26元，升0.95%，創一個月高，可候回調至4.15元吸納。男人唔會買胸圍但可買胸圍股，都算一種浪漫。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
