耶倫白鴿轉
2016年03月31日
港股三月份季結前夕，美國聯儲局主席耶倫再走出來放鴿，為港股帶來突破，恒指高開再上，全日升咗437點，為2016年首季結算整番個靚靚哋的成績表。
耶倫前晚出席紐約經濟俱樂部發表經濟前景報告，拋出一句「委員會在調整政策時謹慎(cautiously)
行事是恰當的」，被市場理解為加息降溫，加上佢話如果美國經濟失調，當局將推出更多購買債券措施，鴿派姿態仲更明顯。
內銀業績叫做收貨
耶倫講話之後，投資者相信4月份應不會加息的可能，花旗集團預計今年只會加息一次。受講話刺激，美股杜指上日漲98點，收報17633點。
在耶倫講話前，有聯儲局理事公然話美國有加息條件，消息一度令市場情緒緊張起來，美元匯價應聲彈高。由於鷹派先出來巡遊，令耶倫的鴿派言論出乎市場意料，覺得方向混淆。
中環茶友就唔排除，呢次係主席同理事「扯貓尾」，皆因利率政策有時需要清晰，有時就要模糊。一般而言，加息前就要做俾市場充足心理準備，唔好俾加息嚇親，搞出股災或金融災難；相反，若然唔加息，就要含含糊糊，以免市場過度亢奮，所以唔排除聯儲局要員先鷹後鴿，係夾份做場大龍鳳。
耶倫對美息態度比預期鬆軟，令人民幣匯價昨日都出現急彈，中國外匯交易中心公佈，人民幣兌美元在岸價收報6.4780兌1美元，升335點子。
睇番去年人仔入籃後，匯價一度急挫。但二十國集團峰會後，傳出內地重申不會任由人仔貶值以提振出口，美國方面就會在加息步伐上協調。呢個講法看來是空穴來風，有點可能。去年自從人民幣匯價下插後，內地金融市場好似漏咗氣咁，如果阿爺發功，真係可以用手指塞住漏氣窿，咁至少減少一個好大的不明朗因素。
由於今次呢個「白鴿轉」咁突然，港股反應有驚喜，恒指高開179點報20545，加上內地股市午後愈升愈有，升2.7%，上證指數上番3000點，帶挈港股升穿100天線，尾市升幅更擴至454點，收報20803點，升437點，升幅亦有2.2%；國指收報8979點，上揚252點，但成交金額752億元，力水仲係唔係幾夠，若然季結後無新消息，唔排除又會唞唞。
藍籌中比較罕見係建行(939) 做咗升市火車頭，佢升3.1%，報收5.05元，同友邦(1299) 為升市主力，合力拉高恒指91點。建行咁威水，多少同內銀公佈業績有關。
內銀昨日公佈業績，中行(3988) 、工行(1398) 盈利大致持平，業績略優於市場預期，撥備雖有增加，派息略有減幅，但都維持在一成之內，減派息幅度可以接受，於是股價普遍造好，幾間大型內銀平均升幅都有些3%左右。內銀派息減幅少於預期，證明之前市場流傳中央喺派息政策盡量維穩的估計無錯，加上大市氣氛好轉，市場反應叫做收貨。
中銀香港靚仔 多賺9%
昨日公佈仲有中銀香港(2388) 公佈去年全年業績，純利升9%至267.96億元，每股基本盈利2.5344元，末期息67.9仙。中銀香港去年淨利息收入257.39億元，倒退3.7%；淨服務費及佣金收入創新高，增長兩成六，至114.65億元。喺生意難做下，佢業績應該算係靚仔啦。
至於首掛的兩隻內銀股，天津銀行(1578) ，收報7.39元，與招股價7.39元相同；浙商銀行(2016) 收3.96元，亦與招股價3.96元相同，入咗飛的小股東呢次真係執身彩。
陸羽仁
金融High Tea 舊文
來源 source: http://hdfin.stheadline.com
