中環在線：估樓價跌三成
四叔：絕冇私心
■李兆基早前唱淡樓市，佢強調自己冇私心。 資料圖片
講起樓市，市場最近議論紛紛，唔明白恒基地產（012）主席李兆基（四叔）因乜事倒自己米，佢老人家賣樓，偏偏唱淡樓市，估樓價將會由高位跌三成。四叔前晚出席培華教育基金晚宴，都俾人捉住問佢點解，四
叔沒好氣咁話，自己冇私心，只係分析完，同大家分享啫。
四叔形容，自己好似中醫睇病咁，透過望聞問切，對個樓市把脈。樓價已經從高位跌咗15%，佢知道未來兩個月有多個新盤推出市場，佢又打聽到，唔少行家準備減價推盤，從而推斷樓價喺未來一、兩個月會跌多5%，去到明年跌足三成，條數就係咁計。
對於有人估佢唱淡樓市嘅背後，可能有其他盤算，佢就強調自己冇私心，指恒地有總值200億元嘅樓盤正在安排推出，佢唔會專登倒自己米，只係講佢嘅睇法。
根據資料，恒地下半年可能會推幾個新盤，包括北角月園街、長沙灣南昌街、鰂魚湧民新街項目等等，講緊過千夥；而各大發展商亦排住隊喺第二季推售多個新盤。若然大家怕樓價跌，唔敢入市，發展商爭住出貨，減價賣樓真係唔奇。
■李敬恩 大孫女幫手做慈善
講番四叔有份成立嘅培華教育基金，唔經唔覺，今年已經成立34年。當年一班工商界人士組織訪問團到北京同西安觀光，之後發起要組織一個基金去幫助內地發展，四叔、霍震寰、方潤華都係發起人。四叔嘅大孫女李敬恩近年加入恒地幫手，舊年亦加入培華，似係準備接棒做慈善。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
