魚樂無窮：跟住矛盾去炒股
亞視不再永恆，新興勢力叫ViuTV。自問不是電視迷，平時鍾意睇新聞多過煲劇，近排卻因多個嶄新節目，特登趕回家收看。係咪真係咁好睇？老實講，「跟住矛盾去旅行」同「G-1格鬥會」兩個主打節目都拖得太長，唔夠緊湊，勝在話題性十足。咁多年嚟，大台劇集內容千篇一律、設
計對白唔用腦、演員熟口熟面，睇一陣都作嘔，全靠慣性收視撐住，絕對係香港競爭力下降嘅元兇之一。如今有新衝擊，肯定係港人之福！
潮流興矛盾，今日唐牛也抽抽水，跟住矛盾去炒股，逆市推介堡獅龍（592）。香港經濟正陰乾中，零售業首當其衝，睇公司業績，中期純利大跌84%，衰到貼地。點解仲推介？
因為早前宣佈出售澳門物業，套現3.5億元，最遲明天發通函，意味距離交易落實近一大步。落實又如何？公司淨現金將大增至6.1億，相當於市值7.9億元嘅八成，以公司愛派息嘅慣性，今次豪派一次絕對不是夢，小注入場等好消息，話唔定能搵夠去旅行嘅本錢！
唐牛
https://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
