創業板騙局
2016/04/14 09:24:49
網誌分類: 經濟
內地貿易數據理想，全球好友借勢炒，至威水係港股恆指啦，大升近4%！法國CAC指數升超過3.3%，日經同德國DAC升約2.8%，中國上證綜指升幅反面比較細，只有1.4%。
外圍得，美股亦有運行，連續第二日造好，而且氣勢不俗
，杜指兩日都有3位數字的升幅。杜指昨日升187點，升幅1.1%，收報17908點，創了5個月高位；標普500指數升21點，收報2082點，升幅都係1%，納指升75點至4947點，升幅1.6%。
美股昨日再升，總括而言，有三個原因，第一固然然係中國公佈靚仔貿易數字，中國昨日公佈3月出口較去年猛增11.5%，係去年2月以來最大增幅，進口雖然較去年下滑7.6%，但幅度遠比上月的下滑13.8%已大幅收窄，數字令投資者覺得全球經濟增長可能並沒有想像般疲軟。
其次係摩根大通業績「過得去」，主要原因係市場預期會係好差，所以大幅降低摩通的盈利預期，而摩通昨日公佈業績，獲利超過調低了的市場預估值。摩通股價昨日大升4.2%，係表現最好的杜指成份股，一眾已經衰咗好耐的銀行股亦跟著大彈，其中花旗彈5.5%，美銀及大摩升近4%，高盛亦漲3.6%。
第三係在風險胃納回升的情況下，市場此前唔敢入市的好多現金，大舉入，淡友冚倉，又進一步推高大市。
CNBC人氣節目《Mad Money》主持人Jim Cramer指從摩通的季度業績報告中，可以見到華爾街擔心銀行可能受到石油公司貸款拖累，出現好多呆壞賬，其實係過份擔心。睇銀行股全數大彈，股票上漲的形態，預示美股已擺脫過去一年的熊市，牛市已經開始，估計可以維持一段時間。
不過，亦有紐約資深分析員懷疑呢種股市已經出現全面轉勢的睇法，認為現在似乎仍係言之尚早。不過，中國經濟利好消息再加上摩根大通盈利好過預期，的確好有可能會好大機會推促成大市出現短期突破。因為中國係市場不穩的主要源頭之一，過去一年以來，中國經濟疲弱，令到全世界股市都唔掂。如果中國的正面貿易數據，再配合其他經濟數據的支持，將大幅改變投資者對中國股票的情緒。
至於其他導致股市波動的因素，包括聯儲局、美元及油價等，近期都顯得比較平靜。從股市恐懼指標VIX指數昨日朝早跌14點的多年以來低位。股票基金恐懼指標:標普500VIX短期期貨指數上幾個月成交量大增，反映投資者買入這些波動指數博油價、中國因素、聯儲局因素、美元或者其他綜合性因素會引爆股市，但這種賭博昨日已出現逆轉趨勢。
不過，講到大已經全面轉勢，卻言之尚早，睇全球股市，雖然富時全球指數（FTSE All-World Index）已經接近今年最高水準，但目前除咗美股逼近歷史新高之外，其他國家股市其實仍未見到有較大的突破，所以大家不要太過度興奮，量力而為好啲。
最後想講講藝人黃翠如個爸爸黃永華新上市那隻建築股聯旺（08217），呢隻股以全配售上市，周二掛牌炒高14倍，周三繼續狂升，最高升2.5倍至14元，較配售價0.26元，高52.8倍! 周三收11.28元，仍升1.8倍，仍然較配售價高42.4倍！翠如BB爸爸黃永華持有4.68億股，佔股37.5%，若以以聯旺昨日收市價11.28元計，持股市值超過52.8億港元，這只是帳面財富，但娛樂版已當正翠如BB係富家女啦。
最好笑做笑位係翠如爸爸隻股市值141億，翠如 BB自己打工那一間 TVB(511)
市值只有123億，一間創業版公司市大過TVB，真係「信一成雙目失明」。一隻做土木工程的創業板股票，至2015年3月底年度盈利1808萬元，炒到779倍市盈率，借中國50年代搞大躍進的名言去形容:「人有多大膽，地有多大產」。呢啲全配售股份圍曬飛，自己友買哂，並無街貨由外人持有，真係要升幾多可以升幾多，市價幾多你真係唔好信呀。 有人可能話，我無咁蠢而家去買。但我怕佢有日急插8成，跌到2.3元時，散戶會走去撈，博即日鮮反彈，你那時會忘記咗，2.3元呢個價仍然係上市價0.26元的9倍，而0.26元的上市價，其實已經係18.3倍的高市盈率。近排好多配售狂升股，都係等跌落來得番高位一兩成時，引來一班撈底客入場，就在呢一浸引到街客接貨殺人啦。翠如爸爸股惹來大量免費宣傳，更易引人落?。結論係呢啲股睇?好啦，唔好掂呀。
陸羽仁
回應(3) 我想回應
陸羽仁 BLOG 舊文
來源 source: http://blogcity.me
