中環在線：問內地升學好唔好
馬時亨寸梁特有心定無意？
■馬時亨及兩位嘉賓的子女們都在外國留學。
現屆政府成日叫香港年輕人多了解祖國，梁振英甚至喺施政報告提倡本地學生到內地升學，今年施政報告亦計劃檢討擴大「內地大學升學資助計劃」嘅資助範圍。但梁振英身體卻很誠實，仔女都係海外升學，細女
梁頌昕最近返美國史丹福大學更爆出「行李門」事件。
內地網站CEO送子赴美
咁啱得咁蹺，噚日政府首次舉辦「互聯網經濟峰會」，港鐵（066）主席馬時亨主持其中一個討論環節時，忽然問到台上兩位科網界CEO，今時今日會畀仔女到美國抑或內地升學。
微軟全球執行副總裁沈向洋本身係香港人，在港畢業後到美國發展，佢話，「本身叫個仔揀HKU，因為貪佢使費平過外國好多，點知佢過咗deadline都冇申請，最後惟有送佢去美國（讀書）」。
內地資訊網站58同城與趕集網CEO姚勁波本身係內地人，佢話，阿仔正就讀國際學校，學校有教中文。佢好坦白咁講，即使內地如今發展迅速，機會處處，但講到大學方面，佢仍然會為阿仔揀美國嘅大學。之不過，「一讀完就要回來，因為互聯網下一個十年的發展，一定是在中國」。
事實上，提問嘅馬時亨，佢兩位掌上明珠都係海外升學，大女馬露明就喺London School of Economics（LSE）修讀經濟與哲學。老實講，今時今日，父母有錢送仔女出國讀書，大多數都會揀外國，好少話首選內地大學，馬時亨今次咁問法，唔知會唔會令梁生嬲嬲豬呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
