智取大市：圓底爆上逐隻起動
■港股如預期向上，恒指噚日升654點大成交破頂。 李潤芳攝
港股如預期向上，噚日恒指升654點大成交破頂，但近幾個月單日成交一過900億元就如魔咒，跟住例牌升完，好嘅話就整固幾日然後再升，唔好就喺頂部派兩日然後又跌過。呢一刻未知係引君入甕將近見頂，定係真升
市連續幾日爆上，但要分辨加上如何操盤，並不困難，如果見指數強勢一升冇回頭，900億元成交接連出現，唔使諗咁多，強勢股繼續hold；如果指數開始見呆呆滯滯成交減少，大市有機會出現見頂跡象，將強勢股換馬至落後股同細價股炒多轉。
前幾日講過航運股中海發展（1138）及中國遠洋（1919）圖靚，唔使兩日就爆上，但噚日推介嘅中海物業（2669）反而呆滯，不過圖靚就唔使擔心，輪流炒之下，只要圖靚已呈突破格局，好好醜醜都會衝多轉。
市場上亦不缺異動嘅落後股，不約而同地，久沉嘅阿里系都有幾張靚圖，包括阿里影業（1060）都呈圓底，再落後啲有神州租車（699），雖然有傳話阿里巴巴入股大陸版Uber嘅神州專車後覺得唔對路，再將股權左手交右手掟畀馬雲嘅雲峰投資，但好好醜醜都沾上阿里概念，至於神州租車業務本來有高增長，13倍PE真係差唔曬，而佢又係近期受歡迎嘅圓底圖，壞消息之下跌唔落，最近穩守保歷加中軸，反映衰到盡時開始有運行，係近期起動前象徵，有條件炒落後。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
