金手指：油股未來點炒
■油價下跌令花旗國好接近爆發石油業倒閉潮。 彭博資訊
周末，全球好多石油交易員（即係啲自動mon住新聞頭條嘅電腦程式買賣機器）同孫柏文一樣，都係睇實全球包括石油輸出國組織OPEC同非OPEC喺多哈嘅「講數會」傾凍產。啲識嘢之士根本冇期望，伊朗一早已宣佈派個低級局
長去。唔係話佢廢，純粹係佢唔話得事，即係伊朗一早已經話一切照舊，唔會凍產。
不過要睇實嘅原因，就係呢場戲究竟沙地阿拉伯會點反應。咁沙地阿拉伯亦都好合拍，好大反應交足貨咁反檯兼喊打喊殺嗌：「伊朗你唔凍產嚇嘩？泵到你哋瞓街呀呀呀！」
講真，伊朗同沙地場大龍鳳，根本係沙地搵伊朗過橋。沙地家陣石油收入大減係咪好傷？係。不過沙地都知佢點做伊朗都唔會減產，做咁多嘢因為志不在伊朗。佢哋恨不得將油價再一沉百踩番落去，原因其實想隊冧所有呢十年來嘅新興石油供應，例如加拿大油沙、花旗國頁岩油。
所以，我相信沙地唔係做戲，今次不但唔會減產，甚至如果仲有產能，會增產，想隊冧油價。因花旗國已經好接近爆發石油業倒閉潮，唔會臨門一腳都唔射埋佢。如倒閉潮唔近，借咗好多畀石油業嘅滙控（005）都唔會有八厘股息啦。
點都好，如沙地增產，咁即係咪油價死梗，油股例如中石油（857）同中海油（883）早沽早著呢？呢個要睇。大陸中央喺舊年尾開始落閘放惡狗，唔畀人民幣流出後，佢哋對成效滿意，所以近月亦開始大印鈔票。中央不但大印鈔，仲要用隻眼開隻眼閉嘅政策，畀啲例如P2P借貸瘋狂集資後，讓鈔票流動速度提升（輸嘅就話啲散戶債主sorry被騙，唔使學銀行咁壞賬要政府孭）。
咁即基本需求可能升緊，令沙地就算增產，油價都會續升。而如果呢一兩個禮拜真係見唔到油價落，就等於石油業永冇硬著陸，油股又可買得。不過再跌的話，咁就油價又要跌一半。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
