大戶沽貨未會即跌
2016年04月19日
上星期美股回軟，加上新加坡突然宣佈採取壓低匯價的政策，令區內市場窒咗步。港股未開已經腳軟，結果指數一度回調測試兩萬一千點關口，最後收市跌幅收窄，睇嚟大戶仲係想托住個市，唔畀佢咁快插番落去。
馬化騰減持 基金接貨
在卡塔爾首都多哈舉行的
石油凍產會議結束，最終一如預期未有達成協議，油價應聲大跌6%，石油相關股份捱沽，部份到尾市略為收復失地。中海油(883) 收報9.57元，挫1.6%；中石化(386) 下滑1.32%，三大石油股，中石油(857) 跌得最多，有1.9%，造5.23元。
喺油價急跌下，加上日本九州地震令日企撲水班師回朝，變相引發日圓拆倉，累港股曾急跌逾300點，收市只跌154點，叫做貼近全日高位收市。國企指數收報9090點，下滑124點，成交金額555億元。初步睇個市喺急挫時交投唔多，沽售壓力唔大，大戶睇嚟唔急於造淡住。
科網股王騰訊(700) 再遭主席馬化騰減持！港交所資料顯示，於4月12至15日，馬化騰按每股均價159.823至164.776元，合共減持2593.89萬股騰訊，套現42.27億元，持股由9.09%降至8.82%。騰訊將於5月18日公佈首季業績，該股股價今日先跌後回升，收造165.7元，微升0.24%。他去年底曾沽股套現，當時平均價153.821至154.957元，涉及金額38.68億元，再次顯示大戶沽貨愈沽愈高。當然，大戶沽得，怕係離頂不遠。
馬化騰喺套現幾十億之餘又宣佈，將捐出1億股股票，注入正在籌建中的公益慈善基金，透過各家公益慈善組織和項目，支持在內地為主的醫療、教育、環保等公益慈善項目，以及全球前沿科技和基礎學科探索。目前騰訊喺內地互聯網世界，同阿里聯手霸佔大部份市場，其他公司都難以競爭，甚至有官方背景的網媒，面對騰訊都大歎唔容易競爭，呢個優勢短期唔容易改變，情形一如二十年前蓋茲嘅微軟雄霸軟件界。直至今日微軟地位依然無同行可以挑戰，只係因為資訊科技由桌面電腦轉移到移動世界，科技界出現範式轉移，才令微軟優勢被削弱。由呢個角度嚟睇，馬化騰無論係減持股份抑或係捐股，都同當年蓋茲淡出微軟大股東地位，係好長遠嘅個人部署，咁亦解釋咗點解大股東不斷沽貨，仍然有大基金願意接貨。
紙上富貴不如真銀實際
最近股市反彈，但陸羽仁對實體經濟係咪好番，仲係抱懷疑態度。其實，好多生意人想法都係一樣。上星期，股市借住出口數據理想炒反彈，航運股紛紛爆升，隔唔夠兩日，就有企業趕出來集資。
太平洋航運(2343) 宣佈大折讓供股，股價應聲重創，從大股東同管理層角度，股價係紙上富貴，唔可以當得錢使，喺全球貿易環境唔明朗下，印一股票換銀紙先至最實際。
今次太航建議以「一供一」方式進行供股，供股價為每股0.6元，較上個交易日收市價大幅折讓58.3%。公司預期集資額1.43億美元，將用作強化公司資產負債表及流動資金狀況，能於貨船價格跌至歷史低位及具吸引的價格時買船。
太航主席唐寶麟做過太古大班，但佢嫌悶得滯，有大班唔做走出來做航運，咁嘅背景令佢明白穩健經營好重要。
睇番太航連續兩年虧損，雖然去年幅度已經大減，但及時抽水加強手頭現金係明智之舉，不過如果見佢股價上升追貨或者無沽貨者，家就面對掏腰包供股嘅難題嘞。
陸羽仁
金融High Tea 舊文
來源 source: http://hdfin.stheadline.com
