經濟慢 買股唔使急
2016年04月27日
美國聯邦儲備局開會前夕，杜指偏軟，跌破萬八點收市。美股老牛上到去歷史高位前，唔係咁易再發飆。市場預期聯儲局短期唔會有乜標奇立異動作，美元弱弱哋，但暫時對股市唔似有乜大刺激。
外圍無動靜，好嘅係內地股市反覆造好，港股連跌兩
日一度再插逾兩百點，午後開始反彈，恒指收報21407點，升102點；國企指數收報9016點，漲29點，成交金額628億元。
匯控(005) 及騰訊(700) 為升市主力，合力拉動恒指59點，匯控走高1.56%，收52.25元；騰訊走高1.19%，報161.8元。
天能動力(819) 被內地傳媒對其去年業績提出質疑，股價一度狂瀉22%，隨後跌幅收窄後中途停牌，停牌前造6.31元，仍瀉17%。其他電池股亦捱沽，超威動力(951) 挫5%，造4.7元；理士國際(842) 插近10%，造0.92元。
呢幾日同位熟悉內地經濟生意人講起投資，佢去年第一季入咗啲內銀股，趁後來政策牛市沽咗，佢話相隔一年又趁低位買番。我問佢點解仲敢買內銀股，乜唔驚內地經濟硬着陸咩，佢列舉咗三大理由話唔驚。
高位唔追 平要敢買
佢話，首先，自己係高沽低買，家只係買番之前高位沽啲貨；其次，內銀有息收，若然暫時吃虧，就坐住先；最後一樣比較難睇，就係內地經濟，呢樣就比較考眼光。
不過，佢話雖然去年內地匯改，一度令大家對阿爺失去信心，但中央除了運用市場，必要時仲有行政力量，政策空間始終大過其他地方。內銀息率咁高，就算打折回報都仲可以接受。佢相信阿爺唔會俾內銀執笠，所以低位買番，不過，家內銀股已經升番唔少，佢開始分段食胡，博佢遲啲回番又買過。因為家已經四月尾，好快又到五、六月傳統淡季，個市插吓都唔奇。
佢繼續中港股市近日表現弱勢，一大理由係實體經濟令人失去信心，佢畀咗最近做過國家統計局局長邱曉華寫的一篇分析內地經濟前景長文畀我睇。邱曉華話，內地增長放緩有政策因素，表現在兩方面：第一，近些年的住房制度改革、醫療制度改革、教育制度改革，使城市人的收入中很大一部份要用於住房消費、教育消費、醫療消費。這個情況令中國從低收入邁進到中等收入的「消費井噴」，在中國並沒有完全地出現。
第二，反腐敗、八項規定等政策性的調整，雖然有歷史性的進步意義，但反腐政策將這條「消費井噴」路堵上了，因此高檔商品、高檔餐飲、高檔服務業的市場迅速降溫，這些消費沒有了。
他估計，未來一段時間，中國經濟很可能就像人們說的，是一個「L」形的發展態勢，由底要往上走，在未來若干年都不是那麼容易。
他指出，中國GDP今年一季度6.7%，第二季度如何，我想中國經濟的增長，如果在投資、工業增長、出口沒有明顯改善，就很難扭轉下行。
他估計，按目前趨勢，二季度有可能出現階段性的回穩，可能經濟不再下行，在6.8%左右的區間，至少不會低於一季度的6.7%。下半年，如果目前穩增長的政策能夠放大，下半年有可能在二季度的基礎上略有回升。
非經濟因素力撐保底
邱曉華還指出，有一個因素需要特別留意，「十三•五」開局這個非經濟因素對中國經濟的影響，有可能在今年開始會變得更有利一些。因此，他認為2016年的中國經濟雖然是困難的一年，但是在困難中還是能夠實現不跌破底部的發展。6.5—7%作為今年的目標守住，估計概率是比較大的。由於邱曉華現在已不是核心官員，他的說話只能當作分析參考，但同時也比較中立，可以當作熟悉內地經濟規律的專家之言。如果他的分析無錯，就未必會出現老外唱淡的硬着陸情況，按照呢個分析，大陸相關股票低位可以買啲，但就絕對不宜心急囉。
陸羽仁
金融High Tea 舊文
來源 source: http://hdfin.stheadline.com
