中環在線：攞命陳帶西安團
晚晚有節目
■陳德霖 
華華今日開始搬去同八方做鄰居，行孖咇繼續同大家八盡政商界趣聞。講起笑料，一帶一路都係好題材，而人稱攞命陳嘅金管局總裁陳德霖上星期原來亦帶團上西安考察一帶一路，團員包括銀行高層與非執
行董事，有團員笑言，三日兩夜嘅行程，編排得相當緊湊，陳總基本上由頭跟到尾，其中一晚又安排大家一齊去著名景點華清池睇大型實景歷史劇《長恨歌》，保證大家冇精神去作反！
舟車勞頓睇秦俑華清池
早前一個「一帶一路訪京團」變成「女伴唱K團」，陳總喺呢個時候帶團北上研習一帶一路，好似幾敏感，不過陳總為官多年，又最叻避開潛在炸彈。有團員爆料話，佢哋第一日落機就去參觀兵馬俑，全日舟車勞頓；第二日朝九晚五密集式上習修班，不過可以同中銀監主席尚福林，仲有其他內地半官方金融機構嘅代表面談，實屬一次難得機會。
當晚佢哋以為可以休息，整理一下思路，原來又有節目安排，成班人一齊去華清池睇《長恨歌》。呢套劇係西安近年旅遊熱點之一，賣點係實景演出，配合高科技，講述將唐明皇與楊貴妃嘅愛情故事。整個演出兩粒鐘，加埋一來一回兩粒鐘，佢哋返到酒店已經半夜，兼筋疲力盡了。難怪陳總預先講明，話今次行程好緊湊，叫團員們晚上唔好去玩喇，根本都冇乜氣力再去跳舞唱歌喇啩。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
