笑到最後：
究竟股災會衰邊瓣
■香港現時情況，本地消費仲撐得起。 資料圖片
上期講到，樓市一差，政府會提你，例如公務員凍薪同推出助人買樓嘅政策，到時就已經係差到政府都睇淡，即係離見底不遠，長揸贏面99%，只欠誘因挾起個市。
同樣道理，要個市突然間撥落去，一定要有誘因，否則現時市況，高明
打死唔信會好壞，因為：1.任何繁忙時間，停車場時租都極難搵位，部份公立月租停車場每個月有一日要排通宵等車位，其他私家月租車場越租越滿，經濟差唔係咁；2.你試下情人節或者母親節唔訂枱去一間啱氣氛嘅餐廳做walk-in客？
香港現時情況，只係「自由行」嚟香港齋行冇幫襯，本地消費香港人仲撐得起，至於咩誘因造冧個市？
一、疫症。據政府所講，中國人在港周街屙屎，港人要包容。政府連周街屙屎都接受到，即係整個醫療體制已經忘記咗沙士嘅教訓，中國一旦再爆乜爆物，好快傳到香港。加上香港民心已經回歸，周街噴已經係大勢所趨，戴口罩係沉默少數，中國如有疫症，香港人一定可以分享中國人嘅光榮。
二、中式金融危機。08年金融海嘯震央喺美帝，香港影響有限。如果下一浪喺中國，肯定影響大好多。不過，高明唔太信中國會出現金融危機，因為中國會用盡辦法去債冚債，將問題一直拖後，所以出現迷失幾十年機會較大。
三、核災。台山核電廠零件測試有安全問題，合資嘅中廣核集團子公司中廣核（1816）股東會後被記者追問冇回應，首先相信子公司條𡃁根本唔知發生咩事。
不過，就算搵佢老闆出嚟都唔會講嘢，而將來就算出咗事，亦都唔會出聲。有災害唔公佈，係會令危機加劇，大家估估嚇，仲易人踩人。至於發生機會率，高明希望係零，因為有核災就唔止經濟危機咁簡單。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
