智取大市：爆邊劇本已出現
■未來兩周係股市蜜月期，偏強機會大。 資料圖片
上周五美國公佈非農新增職位超預期後，市場反應十分有趣，美債又升、美股又升、金價插完又升番，乜都升。換轉英脫歐公投前，如美國數據好，代表加息機會增，美股未必升得起。
市場反應有異嘅原因，就係英脫歐消息後，市場全面
賭美國唔加息，英、日甚至歐洲會擴大放水，預期資金更氾濫，足以浸起不同類型資產價格，唔理是否避險。反正市場預期點都放水，美國數據好，投資者自然更歡迎。That"s why非農數據好，美股升得更勁。
經驗所得，今次資金再度氾濫嘅預期，會持續一段時間，投資者會趁各國開水喉消息見光前，將資產價格炒高，turnout真炒錯先算，因去到升勢末段，總會呃到人入場接貨，對大戶嚟講冇壞，重點係有一個升市convincing嘅理由。
按時序去睇，英倫銀行之前放寬銀行資本要求變相放水，7月14日未必有新動作，下次有央行議息要到7月26日（美國同日本），所以未來兩周就係股市蜜月期，偏強機會大，美國7月唔加息已成定局，若如願7月尾日本央行加大量寬，升勢會再癲些少。短線最佳選擇，地產股同科網股。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
