恐懼與貪婪
2016年07月11日
英國脫歐危機第一波渡過，未來半年還是不穩定期，直至英國和歐洲敲定貿易安排，以及跨國金融機構落實是否留英為止。目前比較擔心是意大利等地會否觸發銀行危機。
大炒家索羅斯對英國脫歐問題有少少轉軚，在公投前他講到英國脫歐影響好壞。上周五，索羅斯再發文話
，德國、法國、意大利等地的選民，會發現英國脫歐是一個好機會，游說歐盟改革，包括動用大體上沒使用過的信貸。雖然索羅斯的講法有少少一廂情願，但都反映市場情緒開始穩定下來，不覺得英國脫歐係世界末日。
職位大增 美股向好
上周五的一件大事是美國非農業新增職位意外大增。尤記得美國5月新增職位大幅放緩到只得1.1萬個，當時令市場大跌眼鏡，同樣令人跌眼鏡的是上周五新公佈的6月份數據，忽然大幅增加28.7萬個，遠勝市場預期的18萬個，創下8個月來最強勁升幅。數字較市場原先預期的18萬個，足足多出逾10萬個。上月美國失業率則由5月的4.7%升至4.9%，略高於市場預期的4.8%。
美國非農職位數字大升，刺激華爾街股市上周五大升，杜指收市報18146點，升250點或1.4%，創今年新高，距離去年5月的歷史高位18312點，相差不足200點，標普500指數收市報2129點，升31點或1.5%，貼近紀錄高位2130點。
美國就業數據好，就令人聯想到加息機會增加，數據公佈後，美國利率期貨顯示，市場仍相信聯儲局今年加息機會相當低，明年上半年前的加息機會亦不超過50%。
不過，有「聯儲局線人」之稱的資深記者Jon Hilsenrath預期，聯儲局在本月中議息時雖不會加息，但上月就業數據強勁，已提高該局最早在9月份加息的機會。但「債王」格羅斯則預期，聯儲局今年只會加息一次。
我就話美國的經濟數據Chok上Chok落，時好時壞，總體而言，美國經濟狀況雖然好過歐、日、中，但底子都唔係幾好，對經濟不能寄望太高。在此前提下，美國能加息的幅度相當有限，若然真係9月快快加咗，好可能拉番經濟落嚟。總體而言，放慢加息的機會唔低。
難抵壓力愈插愈沽
上周末收到老師WhatsApp提問，話「如果我將手中的5號仔(匯控)沽出，轉為20號仔(會德豐)，會否好的？」
收到這類型提問，都是大市或目標股狀況較差的時候，正所謂唔衰唔會問。通常問得都係股價跌到好殘的股份，以中長線而言，家沽會否真係跌到近底先至沽呢？我知道老師的匯控是多年前百幾元時買，作退休收息過活之用，唔好彩隻股唔爭氣。但揸咗咁多年，70元無沽(52周高位71.5元)、60無沽、50都無沽，為何40幾先沽？這是一個難以抵受壓力、愈跌愈想沽的感覺。
這裏想到股神巴菲特的名句，「要在人們貪婪時恐懼，要在人們恐懼時貪婪」，現在英國脫歐，人人恐懼，我們是否不要驚得太緊要大手沽貨呢？
「人們恐懼時貪婪」這句話，當然也會有錯誤的時候，主要三個出錯的情況︰
第一，短線好易錯。股票跌開有個動能，會反覆向下，英國脫歐局面未定，好似匯控咁多業務在英國，反覆再跌的機會不低，叫人唔沽，可能三幾個月去睇都係錯，匯控46.8元唔沽，萬一跌到40元，佢就會怪你做乜阻住佢沽貨。
第二，入市太快。同上面講的情況類似，不過係講買貨，唔係講唔沽貨。若危機初現時飛身撲入，用盡所有注碼下注買貨，點知佢仲深度下跌，就會好傷。電盈(008) 在2000年時，最高升到28元，如今得番5.44元，仲要五合一之後的股份，現價等如未五合一之前的1.088元。若然你在14元買，如今睇只剩零頭。第三，買錯永遠不能翻身的股份。電盈仲有啲渣，有啲公司會執埋，渣都無。
手持大股 唔郁賺息
股神話「人們恐懼時貪婪」，主要講美股大市，在大跌市時買嘢。或者買好大隻好有質素的股份，首先唔驚整體大市或大股會執笠，第二唔平唔入，電盈14元時咁高PE的股票，股神當然唔會入。第三係唔好入得太快，最好分段入，唔好有金執咁一下就瞓身入貨，睇2008年金融海嘯時，股神買嘢都係步步為營，入股高盛都係買優先股，收息佢收先，而唔係買普通股。
若果套用到老師的環境，股神上身去答，就係唔好「人們恐懼時你更恐懼」，首先分析股份的基本面。若然比較匯控和會德豐，匯控46.85元，市盈率9.3倍，市帳率0.63倍，息率8.44厘，現價貼近一年低位44.5元。會德豐36.8元，市盈率5.3倍，市帳率0.37倍，息率3.1厘，現價是一年的中間位，距低位27.35元尚遠。
雖然銀行股和地產股大不同，市盈率匯控都係高啲，但派息最實際，匯控以高息引客，若然頂得順，都會派高息，派息遠比會德豐高。以一個退休人士的考慮，匯控派高息係一個好吸引的因素。假設兩年之後，匯控跌完又上番46.85元樓上，揸佢就賺咗利息。
你可能會問，若匯控業績轉差，壞帳大升，能否保持這麼高的派息，令人懷疑。這點我亦同意，匯控身處英國脫歐風眼，風險不言而喻，所以不能假設匯控業績不會轉差，要預匯控派息會減少，即使減到5厘，仍然是一個吸引的水平，遠比會德豐派3.1厘息高。
分散風險 唯一好處
同樣地，地產收租股一樣有盈利減少派息下降的風險，會德豐持有的收租物業優質，但商用物業市道正下滑中，而且商戶被租約鎖死3年或以上，租金下調空置率升的問題，要慢慢才浮現。售樓方面，佢今年賣樓100億的目標不易達到，以批地數量計，2020年高落成量殺到，以可以早3年開售樓花計，明年樓花供應大增，發展商銷售有壓力，所以地產股較低迷。雖然短線加息機會下降，地產股或會炒炒反彈，但拉長少少睇，此行業的壓力不亞於銀行股。
結論係一動不如一靜。我畀老師的建議是若想換馬，也不要現在換，等匯控有較佳反彈才換。要換也不要全換，換三分一就算，換部份的唯一好處是分散風險，不要買死一隻股，較啱退休人士的需求。壞處是在恐懼時沽貨，就不斷以平股換較貴的股份。現在投資環境較差，唔係咁易搵又平又有前景的好股。
陸羽仁
金融High Tea 舊文
來源 source: http://hdfin.stheadline.com
